Vdekjet në kamion në Essex – Sa i rrezikshëm është udhëtimi për në Mbretërinë e Bashkuar?

Policia Britanike ende po punon për identifikimin e viktimave dhe pikën e origjinës së kamionit të gjetur në Mbretërinë e Bashkuar. I vetmi detaj që është dhënë deri tani është se 38 prej tyre ishin të rritur dhe 1 ishte adoleshent.

Fillimisht policia mendoi se kontejneri kishte mbërritur në Mbretërinë e Bashkuar nga Bullgaria por më vonë thanë se kamioni kishte hyrë nga Belgjika.

Çdo ditë, qindra azilkërkues nga Siria, Pakistani, Afganistani dhe Irani përpiqen të kalojnë rrugën e Ballkanit për të arritur në Europën perëndimore. Shumica e tyre mbërrijnë në Bullgari, pasi kalojnë nëpërmjet Turqisë. Që andej, ata përpiqen të kapërcejnë Serbinë, Bosnjën dhe Kroacinë, duke shpresuar të arrijnë Slloveninë, një vend Shengen, përpara se të shkonin në Itali, Austri apo Gjermani.

Mërgimtarët shpesh përballen me rrahje brutale brenda vendeve të Ballkanit ndërsa kalojnë kufijtë. Duke u nisur në grupe ata lëvizin kryesisht natën duke u munduar të shmangin policinë. Kushtet në të cilat ata qëndrojnë janë shumë të vështira. Emigrantët që kanë provuar kampe të drejtuara nga qeveria bullgare thonë se azilkërkuesit abuzohen dhe sulmohen vazhdimisht nga policia.

Meqenëse vendet e Europës Lindore, si Hungaria, kanë mbyllur kufijtë e tyre, vendkalimet janë bërë gjithnjë e më të rrezikshme për emigrantët. Shpesh, mënyra e vetme për të vazhduar udhëtimin është në kamionë të cilat shpesh herë menaxhohen nga kontrabandistët.

Muajt e fundit autoritetet kanë vënë re një rritje të konsiderueshme të vendkalimeve të paligjshme. Policia gjithashtu ka larguar azilkërkuesit për shkak të mbipopullimit të kampeve.

Që nga viti 2014 Organizata Ndërkombëtare për Migracionin ka regjistruar numrin e njerëzve që kanë vdekur në tranzit. Në gjashtë vitet e kaluara, shifrat tregojnë më shumë se 33.700 vdekje.

24 persona kanë vdekur në rrugën e Ballkanit Perëndimor deri më tani këtë vit: tetë vdekje në Bosnje dhe Hercegovinë, gjashtë në Serbi, pesë në Kroaci, tre në Maqedoninë e Veriut dhe dy në Slloveni.

Nebi Xhomaqi / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.