Veliaj: “Investojmë për Tiranën e së ardhmes, komuniteti arbëresh i bën nder të dy vendeve”
Në ditën e dytë të vizitës së tij në Itali, kryetari i Bashkisë së Tiranës, Erion Veliaj zhvilloi një takim të hapur në Universitetin D’Annunzios në rajonin e Abruzzos, me studentë, sipërmarrës dhe administratorë, për të diskutuar mbi modelet e zhvillimit të qyteteve.
Kryebashkiaku Veliaj bëri një paraqitje të Tiranës gjatë periudhës së tranzicionit, duke u ndalur në mënyrë të veçantë te punët dhe zhvillimi që ka pësuar kryeqyteti shqiptar në dy vitet e fundit.
“Kemi vendosur të mos përsërisim gabimet e së kaluarës. Pra, të mos mjaftohemi thjesht duke u dhënë zgjidhje emergjencave të momentit, por duke investuar tek e ardhmja. Kemi vendosur të ndërtojmë një model zhvillimi të qëndrueshëm për qytetin; të përballemi me nevojat e së tashmes, pa rrezikuar nevojat e së ardhmes; të mos veprojmë duke menduar sikur nuk ka një të ardhme pas mbarimit të mandatit tonë, por të investojmë për Tiranën e brezave që vijnë”, tha kreu i Bashkisë së Tiranës gjatë fjalës së tij në Universitetin .
Ai theksoi se Bashkia e Tiranës, krahas investimeve në infrastrukturën urbane, një vëmendje të veçantë i ka kushtuar edhe zgjidhjeve inoavative, që gjithashtu lehtësojnë aksesin e qytetarëve te shërbimet.
“Çfarë e bën një qytet më të mirë? Ekonomia, shërbimet dhe infrastruktura, pa dyshim. Por, edhe inovacioni, rekreacioni, arti, kultura dhe mjedisi. Për herë të parë në historinë e Tiranës kemi vendosur të marrim parasysh edhe këta elementë, duke i konsideruar si investime strategjike për të ardhmen e qytetit”.
Në Rajonin e Abruzzos, Veliaj vizitoi panairin e prodhimeve dhe artizanëve të arbëreshëve të zonës, ndërsa theksoi se komuniteti arbëresh është një urë lidhëse shumë e fuqishme për miqësinë që ekziston mes Italisë dhe Shqipërisë.
“Besoj se ekzistenca e komunitetit arbëresh është edhe një kompliment i madh për Abruzzon dhe Italinë. Besoj se komuniteti arbëresh i bën nder të dy popujve, kanë marrë më të mirën e Shqipërisë, me më të mirën e Italisë dhe kanë ndërtuar një komunitet që është një shembull i shkëlqyer”, theksoi ai.
Ndërkaq, kryetari Veliaj dhe Presidenti i Rajonit të Abruzzos, D’Alfonso mbollën edhe një pemë në shenjë miqësie dhe bashkëpunimi në Piazza Italia.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.