Vend vakant për anëtar në Këshillin Drejtues të RTSH-së – Kushtet, dokumentet dhe afatet për aplikim
Kuvendi ka publikuar sot në faqen e tij zyrtare njoftimin lidhur me vendimin e Komisionit për Edukimin dhe Mjetet e Informimit Publik i cili ka hyrë menjëherë në fuqi. Ky i fundit vendosi në mbledhjen e zhvilluar ditën e djeshme shpalljen e një vendi vakant për anëtar në Këshillin Drejtues të RTSH-së.
Komisioni Parlamentar ka ftuar të paraqesin kandidaturën për këtë pozicion subjektet si:
- shoqatat dhe grupimet e mediave elektronike;
- shoqatat e medias së shkruar;
- profesoratin dhe shoqatat e inxhinierisë elektrike dhe elektronike;
- profesoratin e së drejtës, gazetari-komunikimit dhe ekonomisë, shoqatat e juristëve dhe Dhomën Kombëtare të Avokatisë;
- organizatat jofitimprurëse që veprojnë në fushën e të drejtave të njeriut, të drejtave të fëmijëve ose kërkimeve në politikat publike, ose përfaqësues të shoqatave që veprojnë në fushën e mbrojtjes së personave me aftësi të kufizuar.
Subjektet e mësipërme duhet të paraqesin kandidaturat brenda 30 ditëve nga publikimi i këtij njoftimi pranë sekretarisë së Kuvendit. Ndërsa 12 janari është përcaktuar të jetë edhe afati i fundit për dorëzimin e kandidaturave.
Propozimi i çdo kandidature duhet të përmbajë:
- CV-në e nënshkruar në çdo faqe nga kandidati.
- Librezë pune ose vërtetime te tjera që provojnë përmbushjen e kriterit ligjor të përvojës në punë.
- Vërtetim i gjendjes gjyqësore.
- Formularin e vetë deklarimit në zbatim të ligjit 138/2015 për dekriminalizimin, i cili gjendet i publikuar në faqen zyrtare të Kuvendit të Shqipërisë.
- Formularin e plotësuar në zbatim të ligjit nr.45/2015, “Për të Drejtën e Informimit për Dokumentet e ish – Sigurimit të Shtetit të Republikës Popullore Socialiste të Shqipërisë”, i cili gjendet bashkëlidhur këtij njoftimi.
Kandidaturat duhet të plotësojnë një sërë kriteresh, ku më kryesorja lidhet me përvojën e punës, e cila specifikohet të jetë jo më pak se 10 vjet në fushat e listuara më poshtë:
- medias në përgjithësi;
- transmetimeve audiovizive të shërbimit publik, tregtar ose jotregtar;
- prodhimit të përmbajtjes së transmetimeve audiovizive;
- teknologjive të medias;
- ekonomisë, administrimit dhe rregullave te konkurrencës;
- çështjeve të zhvillimit të gjuhës shqipe;
- çështjeve që lidhen me personat me aftësi të kufizuar e grupeve të tjera vulnerabël;
- artit, kulturës e muzikës;
- drejtësisë, ligjit, administrimit publik;
- shkencës, mjedisit dhe zhvillimit teknologjik;
- mbrojtjes së konsumatorit;
- veprimtarive shoqërore, edukuese dhe zhvillimit të bashkësive lokale, publike e kombëtare, të cilat kanë lidhje ose ndikojnë në mënyrë të drejtpërdrejtë mbi qëllimet e veprimtarisë audiovizive, siç përcaktohet në këtë ligj
Në njoftimin e Kuvendit, renditen edhe dy kritere të tjera sipas të cilit anëtarët e KDRSHT-së nuk mund të jenë individë që:
- janë anëtarë të partive dhe shoqatave politike, kandidojnë për deputet apo janë zgjedhur të tillë gjatë 2 legjislaturave të fundit, kanë konkurruar për kryetar të njësive vendore në zgjedhjet e fundit të organizuara për to apo kanë ushtruar detyrën e kryetarit të bashkisë, anëtarit të Këshillit të Ministrave apo të prefektit gjatë 3 vjetëve të fundit, si dhe ata që janë anëtarë të Këshillit të Ankesave, AKEP-it apo punonjës të këtij të fundit;
- janë persona të lidhur, sipas përcaktimeve të ligjit nr. 9367, datë 7.4.2005 “Për parandalimin e konfliktit të interesave në ushtrimin e funksioneve publike” ose që kanë në pronësi pjesë kapitali apo aksione të shoqërive tregtare, si dhe të drejta të tjera në fushën e transmetimeve audiovizive, reklamës, prodhimeve të përmbajtjes së transmetimeve audiovizive, rrjeteve të komunikimit elektronik apo persona të punësuar gjatë vitit të fundit, anëtarë të organeve drejtuese apo këshilluese të këtyre subjekteve apo të lidhur me ndonjë licencë me këto subjekte.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.