Vendi me ‘fëmijët më të lumtur në botë’ – Cilat janë arsyet që ndikojnë?!

Fëmijët në Holandë janë ndër më të lumturit në botë, ka sugjeruar hulumtimi dhe ekspertët thonë se mund të ketë një sërë arsyesh pse ndodh kështu.

Një raport i UNICEF-it i publikuar vitin e kaluar zbuloi se fëmijët në Holandë kishin ndjenjën më të lartë të mirëqenies. Agjencia e Kombeve të Bashkuara për Fëmijët analizoi të dhënat në 41 vende me të ardhura të larta, duke renditur vendet sipas mënyrës se si ata rezultonin për mirëqenien mendore të fëmijëve, shëndetin fizik dhe zhvillimin e aftësive akademike dhe sociale.

Holanda u rendit më e larta në tabelën e ligës me tre rezultatet e mirëqenies, e ndjekur respektivisht nga Danimarka dhe Norvegjia. Kili, Bullgaria dhe SHBA ishin në fund të tabelës.

Më vete, indeksi i Organizatës për Bashkëpunim Ekonomik dhe Zhvillim 2020 për jetë më të mirë tregoi se Holanda shënoi mbi mesataren në një numër fushash, duke përfshirë të ardhurat, arsimin, strehimin dhe gjendjen shëndetësore.

Ekspertët thanë se ishte e rëndësishme të kuptohej roli i faktorëve socio-ekonomikë në ndikimin e lumturisë së fëmijëve. Nëse një fëmije i plotësohen disa nevoja, gjë që ka më shumë gjasa në një vend të pasur, ka një shans më të madh për të arritur lumturinë. Një stil i sigurt prindërimi, i cili vendos “kufij të qartë me shumë dashuri dhe ngrohtësi … është treguar vazhdimisht se lidhet me rezultatet pozitive për fëmijët”.

Përveç kësaj, ekpsertët thonë se turpi mund të jetë vërtet i dëmshëm për fëmijët dhe se holandezët kanë një reputacion për të qenë të hapur për të folur për tema që mund të konsiderohen më të pakëndshme për t’u diskutuar në vende të tjera.

Raporti i UNICEF-it theksoi gjithashtu se jo të gjithë fëmijët që jetojnë në vendet e pasura kanë një fëmijëri të mirë.

Për të luftuar këto mangësi, UNICEF-i u bëri thirrje vendeve me të ardhura të larta të konsultohen me fëmijët se si mund të përmirësohet jeta e tyre dhe të sigurojnë integrimin e politikave për të rritur mirëqenien e tyre. UNICEF rekomandoi gjithashtu që vendet të përshpejtojnë përpjekjet për të përmbushur Objektivat e Zhvillimit të Qëndrueshëm, si ulja e varfërisë dhe përmirësimi i aksesit në kujdesin ndaj fëmijëve. CNBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.