Vendimet e qeverisë – Hiqet tarifa e shërbimit në QKB, paga minimale 24 mijë lekë
Qeveria ka miratuar dy ndryshime që lidhen me Qendrën Kombëtare të Biznesit. E para ka të bëjë me përmirësimin dhe thjeshtimin e procedurave e proceseve të punës pranë kësaj qendre si dhe reduktimin e kohës së aplikimit.
E dyta ka të bëjë me zerimin e tarifës për shërbimin në sportelet e Qendrës Kombëtare të Biznesit. Aktualisht kjo tarifë sipas vendimit “Për miratimin e tarifave për shërbimet funksionale të Qendrës Kombëtare të Biznesit” është 100 lekë.
Ministria e Zhvillimit Ekonomik, Turizmit, Tregtisë dhe Sipërmarrjes ka propozuar edhe krijimin e Fondit të Sipërmarrjes Turistike.
Ky fond ka për qëllim dhënien e ndihmës financiare deri në 1 milion lekë, në formë subvencioni të drejtpërdrejtë ndërmarrjeve mikro dhe të vogla që operojnë në sektorin e turizmit.
Në varësi të projektit aplikantëve fitues mund t’ju mbulohet 60 deri në 80 për qind e kostove të pranueshme.
Ashtu sikurse ishte bërë e ditur edhe më herët në mbledhjen e kësaj të mërkure është miratuar edhe rritja e pagës minimale në masën 24 mijë lekë nga 22 mijë që është aktualisht.
Në fund kemi edhe një vendim për shtim fondi Komisionit Qendror të Zgjedhjeve e lidhur me procesin zgjedhor në Kavajë për kreun e Bashkisë si dhe për financimin e fushatës dhe subjekteve për zgjedhjet për Kuvendin.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.