Vendimet e Qeverisë / Manja: ‘Krijohet drejtoria anti-korrupsion’. Do të kontrollojë 47 institucione shtetërore
Gjatë ditës së sotme janë bërë publike vendimet e reja të qeverisë. Ministri i Drejtësisë Ulsi Manja u shpreh se një ndër vendimet e marra ishte edhe krijimi i rrjetit të koordinatoreve anti-korrupsion në vend.
Fjalimi i plotë:
“Sot kaluam në qeveri për krijimin për rrjetin e koordinatorëve anti-korrupsion në vend. Vendimi i sotëm është një nga hapat më të rëndësishëm rregullator dhe institucional të ndërmarrë deri më sot në luftën kundër korrupsionit në administratën publike. Krijimi i një drejtorie anti-korrupsion në Ministrinë e Drejtësisë, do të shtrihet në 47 institucione shtetërore. Do të ushtrojë veprimtarinë parandaluese, do rishikojë të gjithë kuadrin rregullator dhe praktikat me shkallë të lartë korrupsioni, do të hartojë një strategji të qartë kundër korrupsionit, do të trajtojë të gjitha rastet korruptive. Gjithashtu, do të ketë veprimtari ndërgjegjësuese, për të sensibilizuar qytetarët për pasojat e korrupsionit në Shqipëri dhe efektet negative që ka ai në administratën publike për mbarëvajtjen e ekonomisë. Agjencia ka suportin e partnerëve tanë në luftën kundër korrupsionit. Bashkëpunimi kapilar i kësaj drejtorie korrupsion do të jetë me agjencitë ligjzbatuese në vend, pasi fenomeni i korrupsioni frenon zhvillimin e ekonomisë shqiptare. Kjo drejtori do të vetëpastrojë administratën nga punonjës që janë aty për agjenda personale. Është një drejtori antikorrupsion që me mbështetjen e qeverisë do të zbatojë misionin që ka marrë përsipër. Do të kemi raste konkrete në ditët në vazhdim. Unë do ua komunikoj rastet konkrete të korrupsionit në institucionet shtetërore”, tha Manja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.