Vendimet para ’95, ATP zgjeron listën e përfituesve – 150 emrat e rinj të pronarëve që marrin kompensimin
Zgjerohet lista e pronarëve që iu lind e drejta e kompensimit. Së fundmi, në skemë janë përfshirë rishtazi edhe 150 familje me vendime ’93, ’94 dhe ’95.
Agjencia e trajtimit të Pronave pas përfundimit të vlerësimit ekonomik ka dalë me një faturë për secilin prej tyre. Të gjithë ata që gjejnë emrin në listë, gëzojnë të drejtën e aplikimit për t’u trajtuar me një nga skemat e kompensimit, përkatësisht financiar dhe fizik.
Për një pjesë të tyre e cila nuk ka ende një faturë, kjo për shkak të mangësive të konstatuara në dokumentacion. Këto familje kanë 6 muaj afat për plotësimin e dosjes.
Nëse kjo nuk ndodh ligji parashikon vlerësim financiar me çmim minimal të përcaktuar në hartën e vlerës për atë njësi administrative dhe për atë kategori prone.
Për disa prej tyre, e drejta e kompensimit është zeruar. Përbri emrit, në vend të një shifre është shënuar “ezauruar”, duke e konsideruar kësisoj të mbyllur kapitullin e kompensimit për këtë kategori.
Nga të dhënat zyrtare të ATP-së mësohet se deri më tani ka përfunduar vlerësimi financiar për 10.763 dosje në total, prej të cilave 6838 datojnë më 1995 ndërsa pjesa tjetër janë me vendim para ’94-s, shkruan gazeta Panorama.
Ndërkohë prej muajsh ka nisur edhe puna me dosjet e 1996-s.
Ligji i ri përcakton një afat 3-vjecar për vlerësimin ekonomik të 26 mijë vendimeve të formës së prerë që janë të arkivuara. Kjo do të thotë që deri në 2019-n, kjo praktikë duhet të jetë mbyllur.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.