Vendimi / 4.85 mld lekë për rikonstruksionet. Përfitojnë bashkitë e Durrësit, Tiranës, Lezhës, Krujës dhe Kavajës

Këshilli i Ministrave, në mbledhjen e së mërkurës, ka miratuar vendimin për të akorduar rreth 4.85 miliardë lekë nga Fondi i Rindërtimit, për të financuar banesat apo pallatet, që janë dëmtuar nga tërmeti i 26 nëntorit, por që nuk kanë nevojë për rindërtim.

Shuma e vënë në dispozicion shkon për individët që kanë përfituar grantet e rikonstruksionit dhe do të ndahet mes Bashkive të Durrësit, Tiranës, Lezhës, Krujës dhe Kavajës. Bashkia e Durrësit do të marrë pjesën më të madhe të këtij financimi, prej rreth 3.22 miliardë lekë.

Bashkisë së Tiranës i transferohet një fond prej rreth 703.2 milionë lekë, Lezhës rreth 249 milionë lekë, Bashkisë së Krujës rreth 660 milionë lekë, ndërsa Bashkia e Kavajës përfiton vlerën më të ulët prej rreth 18 milionë lekë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.