Vendorët mbledhin 19 mld lekë – Nga 1 Janari hyn në fuqi taksa e re e pronës
Më 1 Janar 2019 hyn në fuqi metodologjia e re e përllogaritjes së taksës së pronës, që do të thotë se qytetarët do të paguajnë më shumë se sa kanë paguar aktualisht. Megjithëse ishte parashikuar që kjo metodologji të niste aplikimin nga 1 Prilli 2018, vendorëve u është lënë afat fillimi i vitit që vjen, në mënyrë që të bënin të gjithë infrastrukturën gati. Por sërish mbledhja e saj do të hasë vështirësi pasi nuk është ngritur kadastra fiskale, ndërsa do ta përcaktojnë bashkitë agjentin e mbledhjes.
Formula e re parashikon që taksa e ndërtesës për familjarët do të jetë 0.05 % e vlerës së banesës, ndërsa për bizneset kjo taksë do të jetë 0.15% . Sa i takon formulës aktuale të vjeljes së kësaj takse, pushteti vendor për 11 muaj të vitit ka realizuar 91 për qind të planit dhe ka mbledhur në total 4.8 miliardë lekë nga qytetarët për taksën e pasurisë, ndërsa kanë mbetur edhe 505 milionë lekë.
Zëri i taksës së pasurisë është i dyti për nga pesha që zë në të ardhurat e bashkive, pasi arkën e vendorëve më së shumti e mbushin taksat lokale ku për periudhën Janar-Nëntor 2018 janë mbledhur rreth 13.8 miliardë lekë më një nivel realizimi në 93 për qind. Referuar treguesve fiskalë të konsoliduar të publikuar nga Ministria e financave, në total bashkitë kanë mbledhur 19 miliardë lekë, ndërkohë që plani është 20.6 miliardë lekë. Taksa mbi biznesin e vogël zë peshën më të vogël ku janë mbledhur rreth 310 milionë lekë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.