Vera jo vetëm në plazh, shqiptarët “dynden” drejt Operas dhe Baletit – Turizmi rrit vizitat në kala dhe parqe arkeologjike
Temperaturat e larta dhe pushimet në plazh nuk i penguan shqiptarët të frekuentojnë edhe jetën kulturore, pra atë të shfaqjeve, teatrove, operas dhe baletit. Për periudhën Korrik-Shtator, numri i spektatorëve në shfaqje apo ekspozita ishte rreth 17,700, duke u rritur me 34,6% krahasuar me një vit më parë.
Kjo rritje është reflektuar sidomos tek frekuentuesit e Teatrit Kombëtar të Operas, Baletit dhe Ansamblit Popullor, të cilët janë gati pesëfishuar, pavarësisht uljes së numrit të shfaqjeve. Për tremujorin e tretë të vitit, ky institucion kulturor pati 4,5 mijë spektatorë për 5 shfaqje.
Në rritje të lehtë janë gjithashtu spektatorët që marrin pjesë në shfaqjet e Teatrit Kombëtar Popullor dhe Teatrit Kombëtar Eksperimental. Artdashësit e dramave e komedive që kanë frekuentuar këto dy institucione për periudhën ishin 5,176 njerëz, ose 11,4% më shumë se tremujori i tretë i 2016-ës.
Numri më i lartë i shfaqjeve ndërkohë për këtë periudhë i takon Arkivit Qendror Shtetëror të filmit, me 22 të tilla. Këto projeksione ose aktivitete janë ndjekur nga 550 spektatorë, për një mesatare prej 25 spektatorësh për shfaqje ose ekspozitë.
Një interes të konsiderueshëm ka edhe për pikturën, skulpturën dhe instalacionet. 3 ekspozitat e Galerisë Kombëtare të Arteve janë vizituar nga 4,633 individë.
Publikimi i INSTAT mbi statistikat e kulturës jep gjithashtu të dhëna për vizitorët e muzeve, parqeve arkeologjike dhe kalave të vendit. Gjatë muajve të verës, pjesa më e madhe e vizitorëve i takon turistëve të huaj ose vendas.
Në krahasim me verën e shkuar, ka patur 332 mijë vizitorë, ose mbi 42 mijë më shumë se tremujori III i vitit 2016. Rritja e vizitave është shpërndarë në mënyrë të njëtrajtshme dhe parqet arkeologjike mbeten më të frekuentuarat me rreth 150 mijë vizitorë. Ndjekin pas tyre kalatë dhe monumentet me 102 mijë vizitorë, ndërsa në fund janë vizitat në muze, 78 mijë të tilla.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.