Vështirësitë në qarkullim – ARRSH: Ja akset problematike, kujdes në mëngjes dhe mbrëmje
Gjatë 48 orëve të fundit vendi ynë është përfshirë nga reshjet e shiut dhe të borës, shoqëruar nga temperatura të ulëta, që kanë vështirësuar qarkullimin e automjeteve në disa akse rrugore. Sipas informacioneve të Autoritetit Rrugor Shqiptar, më problematike rezultojnë disa akse në Qarqet e Kukësit, Shkodrës dhe Korçës. Kështu, aksi Korçë-Dardhë është i hapur vetëm në një kalim, ndërkohë që vështirësi u shënuan në orët e para të mëngjesit.
Sipas të dhënave të fundit, qarkullimi kryhet pa zinxhirë në të gjithë akset e tjera. Edhe në Kukës janë shënuar reshje te dendura dëborë, ndërkohë që në rrugën e Kombit janë marrë masat dhe aktualisht është e kalueshme pa zinxhir. Në Qarkun e Shkodrës, në zonën Pukë-Fushë Arrëz-Qafë Mali-Fushë Dukagjin bora shoqërohet me erë të fortë, ndërkohë që në segmentin Q/Laç-Koman ka rreth 5 cm borë dhe qarkullimi rekomandohet pjesërisht me zinxhirë, pasi ka prani ngricash.
Edhe në Llogara kanë nisur reshjet e dendura të borës, duke diktuar nevojën e përdorimit të zinxhirëve. Në segmentin Tepelenë-Gjirokastër janë shënuar rrëshqitje dherash në vendin e quajtur Uji i Ftohtë, ndërsa në Qarkun e Dibrës në segmentin Klos-Bulqizë-Peshkopi reshjet e borës shoqërohen edhe me erëra të forta që bëjnë grumbullimin e borës në rrugë.
Ndërkohë, në Qarkun e Tiranës , rruga Qafe Piskë – Shëngjergj, Qafe Piskë – Qafë Mollë dhe po kështu edhe nga Lanabregasi në Parkun e Dajtit janë të kalueshme me zinxhirë. ARRSH njofton se të gjithë kontraktorët janë në gatishmëri për situatat qe mund të paraqiten. Ndërkohë që, rekomandon përdoruesit e rrugës të respektojnë sinjalistikën rrugore, sidomos ne orët e mëngjesit dhe në mbrëmje, për shkak te ngricave.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.