Vetëm 1 në 3 shqiptarë mbi pagën mesatare – Instat: Informacioni e komunikacioni me rritjen më të madhe të pagave në 2019
Të dhënat më të fundit të institutit të statistikave sa i përket tregut të punës japin një panoramë deri diku të qartë të pagave sipas sektorëve dhe shpërndarjes së pagave sipas nivelit të tyre në popullsi. Ndërkohë që 27.9% paguhen deri në nivelin e pagës mesatare, vetëm 4.4% paguhen mbi nivelin e 120 mijë lekëve në muaj, bruto. Por, një vit më parë, kjo normë fiksohej në 4.1%. Edhe norma e atyre që paguhen mes 95.000 dhe 120.000 lekëve në muaj është rritur lehtë, nga 3.3% në vitin 2018 në 3.5% vitin e kaluar.
Kapërcim më të rëndësishëm ndërkohë ka bërë fasha e pagës bruto mes 60 mijë dhe 95 mijë lekëve bruto në muaj. Rreth 18.1% e shqiptarëve përfshihen në këtë kategori page, nga 16.7% të një viti më parë. Rreth 8.9% e të punësuarve ndërkohë paguhen mes 50 mijë dhe 60 mijë lekëve. Nga këto të dhëna, rezulton se vetëm 1/3 e shqiptarëve paguhen mbi pagën mesatare bruto, e cila është ngjitur në rreth 52 mijë lekë.
Por cilat janë profesionet apo sektorët ku janë edhe pagat më të larta? Në vend të parë është financa dhe sigurimet me një pagë mesatare bruto në 107 mijë lekë në muaj, e ndjekur nga informacioni dhe komunikacioni me rreth 80 mijë lekë bruto në muaj, e në vend të tretë administrata publike me një pagë mesatare bruto në 63 mijë lekë. Sa i përket sektorit ku është regjistruar edhe rritja më e madhe e pagave në vitin 2019 krahasuar me atë paraardhës, kryeson ai i informacionit dhe komunikacionit me rreth 4300 lekë më shumë mbi pagën bruto, çdo muaj, mesatarisht. Sektorët e tjerë regjistrojnë një rritje mjaft modeste.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.