Vetëprodhuesit e energjisë plotësuan 25% të nevojave – Panelet diellore, ERE: Interes në rritje, mundësi për kosto më të ulta për konsumatorët
Gjatë vitit 2021, vetëprodhuesit e energjisë elektrike plotësuan vetëm 25% të nevojave të tyre për energji, teksa sasia tjetër është furnizuar nga Furnizuesi i Shërbimit Universal. Sipas të dhënave nga Enti Rregullator i Energjisë, në total klientët që kanë instaluar panele fotovoltaike prodhuan rreth 2.67 mln KW, ndërkohë që energjia e furnizuar nga FSHU arriti në rreth 7.74 KW.
Këto shifra tregojnë se konsumatorët, që kanë instaluar panele fotovoltaike kanë plotësuar vetëm një pjesë të nevojave, ndonëse sipas ekspertëve këto impiante mundësojnë prodhimin e 100% të sasisë së energjisë së kërkuar. Më herët ata kanë argumentuar se janë 2 elementë që pengojnë arritjen e këtij objektivi e më konkretisht skema e matjes dhe kapaciteti, që lejohet të instalohet. Aktualisht, skema e matjes parashikon bilancin mujor të energjisë, ndërkohë që ekspertët kanë kërkuar që ky bilanc të jetë vjetor, duke qenë se panelet fotovoltaike prodhojnë më shumë energji gjatë stinës së verës.
Paralelisht, është kërkuar edhe rritja e sasisë së lejuar për t’u instaluar, pasi legjislacioni aktual lejon vetëm 0.5 MW, ndërkohë që shumë prej bizneseve kanë nevojë për më tepër energji. Sipas Entit Rregullator të Energjisë ka në interes të rritur për instalimin e këtyre impianteve, teksa gjatë vitit 2021 ka patur rreth 206 aplikime për ushtrimin e aktivitetit të vetëprodhuesit nga ana e konsumatorëve fundorë dhe për 113 prej tyre është miratuar aplikimi për ushtrimin e këtij aktiviteti dhe lidhjen me rrjetin nga ana e OSSH.
Sipas ERE-s, marrja e këtij roli të ri nga ana e konsumatorit është një mundësi jo vetëm për një sistem energjie më të qëndrueshëm dhe me pak karbon/neto zero, por edhe për një sistem më demokratik dhe gjithëpërfshirës, e mbi të gjitha me kosto më të ulëta për konsumatorët.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.