Vetting mund të zgjasë dhe 5.8 vite! – Alarmi i Avokatit të Popullit: Zvarritja do cenojë performancën e sistemit dhe cilësinë e drejtësisë
Duke llogaritur ritmet e deritanishme të Vetting-ut të gjyqtarëve e prokurorëve, Avokati i Popullit ngre alarmin se procesi mund të zvarritet edhe me thuajse gjashtë vite të tjerë gjë që vë pikëpyetje të forta mbi cilësinë e drejtësisë që do marrin shqiptarët vitet në vijim. Avokati i Popullit ka analizuar rezultatet e punës së Komisionit të Pavarur të Kualifikimit, shkallës së parë të Vetting-ut, deri në fund të vitit të shkuar. KPK është ngritur si institucion dhe ka marrë funksionet e tij zyrtarisht në Qershor 2017, pra përreth 2 vite e gjysëm, dhe gjendet në mes të mandatit të tij zyrtar, çka do të thotë se duhet të ishin rivlerësuar rreth 400 subjekte rivlerësimi deri në këto momente, por numri real i të rivlerësurve është 220, pra mjaft larg këtij numrit që duhet të ishte trajtuar proporcionalisht.
Në rastin më të mire, thekson Avokati i Popullit në analizë, dhe nëse mendojmë në mënyrë hipotetike se dhe për vitet në vazhdim do të ecet me këto ritme dhe do të kemi fatin që subjekte të tjera do të dorëhiqen apo do të mbushin moshën për pension, do të duhej të paktën 4,6 vite që procesi të përfundonte. Por nëse do të jemi realist dhe do ti referohemi ecurisë së deritanishme, për subjektet për të cilët realisht ka përfunduar shqyrtimi administrativë, do të duhej të paktën edhe 5.8 vite të tjera që procesi të përfundonte, gjithnjë nëse ecuria do të ishte me ritmin mesatar të deritanishëm.
Në analizë, Avokati i Popullit citon edhe Komisionin e Venecias, sipas të cilit, zvarritja kaq e gjatë e procesit mund të ndikojë drejtpërsëdrejti në përkeqësim të performancës së sistemit të drejtësisë. “
“Sipas këtij opinioni zgjatja në kohë mund të çojë në një përkeqësim të performancës së sistemit të drejtësisë në vend dhe për këtë kohëzgjatja brenda të cilës ky proçes duhet të kryhet është nga 3 në 5 vite”, thekson Avokati i Popullit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.