Vetting noterëve, kontroll komunikimeve elektronike – Të dhëna edhe nga BKH, inspektime të rregullta të paktën një herë në vit të dyshuarve
Janë publikuar në Fletoren zyrtare ndryshimet ligjore të cilat bëjnë të mundur kontrollin e integritetit dhe lidhjet e dyshimta të noterëve. Bie në sy se ndryshimet i japin Ministrisë së Drejtësisë tagrin të ndërmarrin isnpektime të rregullta periodike ndaj noterëve për të cilët dyshiohet se kanë lidhje me persona me precedentë penalë apo të lidhur me krimin.
“ Në rast se noteri ka kontakte të papërshtatshme me një person të përfshirë në krimin e organizuar ose në kryerjen e veprave të rënda penale, ministri i Drejtësisë urdhëron inspektime të rregullta në vend për të gjitha aktet, regjistrin e veprimtarisë noteriale si dhe çdo dokumentacion tjetër të aktivitetit noterial jo më pak se 1 (një) herë në vit. Noteri i nënshtrohet inspektimit me intervale të rregullta, sipas përcaktimit të pikës 1 të këtij neni, jo më vonë se 2 (dy) vjet nga data e kontaktit të fundit të papërshtatshëm.”.
“Kontakt i papërshtatshëm” është shoqërimi ose mbajtja e lidhjeve nëpërmjet takimeve, komunikimit elektronik ose çfarëdolloj mënyre tjetër takimi të qëllimshëm me një person të përfshirë në krimin e organizuar ose në kryerjen e veprave të rënda penale, kur shoqërimi ose mbajtja e lidhjeve nuk kryhet për shkak të ushtrimit të detyrës.”
Për të zbardhur rastet e dyshuara për kontakte te papërshtatshme. ministri i Drejtësisë kërkon të dhëna, dokumente, fakte ose mjete të tjera të provës nga Policia e Shtetit, prokuroria, gjykata, organet e administrates tatimore dhe doganore, Drejtoria e Përgjithshme e Parandalimit të Pastrimit të Parave, Byroja Kombëtare e Hetimit, shërbimet shtetërore informative, Dhoma Kombëtare e Noterisë, por edhe çdo organ disiplinor që ka mbikëqyrur disiplinën në marrëdhëniet e punës së subjektit të verifikimit, si dhe çdo organ publik, person fizik ose juridik që disponon të dhëna të vlefshme për qëllimet e verifikimit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.