Vetting-u “djeg” prokurorin – Fitoi 5.8 milionë lekë me baste, shkarkohet Luan Kaloçi për pasurinë
Prokurori i Apelit të Tiranës Luan Kaloçi është shkarkuar nga detyra për deklarim të rremë dhe fshehje të pasurisë. Vendimi është dhënë paraditen e se hënës nga Komisioni i Pavarur i Kualifikimit, i cili nuk mori parasysh shpjegimet prej 14 faqesh që dorëzoi Kaloçi për të vërtetuar se burimet e pasurisë së tij qenë të ligjshme.
Në deklaratën e pasurisë së tij u vërejtën mospërputhje të shumta për një apartament me sipërfaqe 140 metra katrorë, bashkë me një dyqan 132 metra katrorë në Tiranë. Të dyja këto prona ai i kishte deklaruar në vite me vlera dhe sipërfaqe të ndryshme që binin në kontradikta me njëra tjetrën.
Një tjetër pikë me probleme në pasurinë e tij ishte edhe shitja e një apartamenti në Elbasan, që fillimisht qe deklaruar me vlerë 200 mijë lekë, por më pas qe deklaruar si burim fondesh për blerjen e pronave në Tiranë. Dyshime për Komisionin solli edhe një shumë prej 5.8 milionë lekësh të fituara nga një kompani bastesh, ashtu si dhe një hua e marrë për studimet e së bijës në Itali, në një kohë kur ajo ishte vetëm 15 vjeç.
Ndërkohë që fat tjetër pati Gjyqtarja e Gjykatës së Tiranës Alma Brati, e cila po të enjten u konfirmua në detyrë. Në deklaratën e saj të pasurisë Komisioni i Pavarur i Kualifikimit evidentoi disa pasaktësi të vogla, të cilat nuk përbënë indicie për fshehje të mundshme të pasurisë.
Lorenca Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.