Vetting-u, lehtësi dënimi “spiunëve” – Të martën hyn në fuqi ligji për bashkëpunëtorët e drejtësisë
1 gushti shënon hyrjen në fuqi të paketës së ndryshimeve në Kodin e Procedurës Penale, e cila përcakton rregulla dhe procedura të reja për dëshmitarët, përgjimet, kontrollin e banesave, hetimin, gjykimin dhe ndëshkimin e zyrtarëve të administratës.
Ndryshimet janë miratuar në mars të këtij viti, në kuadër të reformës në drejtësi, por hyrja në fuqi e tyre u vendos të shtyhej për në 1 gusht.
Një prej neneve më të rëndësishëm të paketës është ai që përjashton nga dënimi të pandehurit që akuzohen për korrupsion, në rast se këta pranojnë të bashkëpunojnë me drejtësinë duke rrëfyer aferat si dhe pasuritë e paligjshme të kolegëve të tyre.
Zbatimi i kësaj praktike, duke përfshirë edhe dëshmitarët anonimë, pritet të hapë një kapitull të ri në luftën kundër krimit dhe korrupsionit, në kushtet kur në krye të kësaj lufte nuk do të jetë më prokuroria aktuale, por Byroja e Hetimit bashkë me Prokurorinë Speciale.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.