Vetting-u në Polici, Xhafaj: Organet të pavarura, do goditen politikanë të inkriminuar
Nga foltorja e Kuvendit, Ministri i Brendshëm Fatmir Xhafaj ka siguruar se organet që do zbatojnë Vetting-un në radhët e policisë do të jenë të pavarura dhe vetë procesi do të jetë i paanshëm.
Ai tha se spastrimi i policisë nga të korruptuarit e të lidhurit me krimin do pasohet nga goditja e të gjithë atyre politikanëve, të majtë a të djathtë që janë të lidhur me grupet kriminale.
“Të gjithë këta punonjës, nga titullari tek punonjësi më i thjeshtë, duhet të verifikohen për sa i përket integritetit, profesionalizmit dhe pasurisë.
Projektligji propozon që organet e vlerësimit të jenë të pavarura nga Ministria e Brendshme apo ekzekutivi në tërësi. Jemi qartësisht të fokusuar në goditjen dhe hetimin e grupeve kriminale dhe aseteve të krijuara prej tyre. Të dhënat tregojnë se disa grupe kriminale zotërojnë edhe kapacitete financiare sinjifikative gjë që i bënë ato mjaftë të rrezikshme për rendin dhe sigurinë.
Nëse përfaqësues të politikës, qofshin këta të majtë, apo të djathtë, janë në një mënyrë, apo në një tjetër në marrëdhënie me grupe kriminale, kanë mbështetje financiare, apo çdo lloj interesi tjetër prej tyre, (në emër të qeverisë ku unë bëj pjesë) sigurojë që asnjë lloj imuniteti nuk do ti përjashtojë ata nga goditja e ligjit”.
Kuvendi u mblodh të hënën në seancë plenare për dy projektligje të rëndësishme, Vetting-un në Polici dhe Kodin e Sjelljes.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.