Vetting-u “përplas” Komisionet Parlamentare. 500 gjyqtarë e prokurorë ende nuk janë rivlerësuar, Manja: “Ritme shumë të ulëta”

Kërkesa e dy komisioneve të Vetting-ut për shtesën e personelit me nga 12 punonjës ka përplasur jo vetëm deputetët, por edhe Komisionet Parlamentare. Ndërsa Komisioni i Ekonomisë ka miratuar shtesën me 12 Këshilltare për Komisionin e Pavarur të Kualifikimit dhe 6 Këshilltarë për Kolegjin e Posaçëm të Apelimit, deputetët kanë akuzuar të dy organet e Vetting-ut për ritme shumë të ulëta pune.  Kjo pasi shkalla e parë e Vetting-ut ka kaluar në sitë vetëm 310 gjyqtarë e prokurorë ndërkohë që mbeten 500 të tjerë. Ndërsa Kolegji i Posaçëm i Apelimit ka një ritëm shumë të ulët pune, me 2.8 vendime në muaj.

“Të gjithë anëtarët e Komisionit ishin në një zë dhe votuan në një zë që nuk duhet të kishte ndryshime të tjera strukturore edhe sipas Ministrisë së Financave sepse përgjatë një viti kanë ndryshuar dy herë brenda një viti, të cilat ne ja kemi miratuar. Prandaj, unë do ta quaja absurde këtë që ne po bëjmë sot.” – u shpreh Bashkim Fino.

“Ne do ta kalojmë këtë ndryshim në strukturën e këtij institucioni sot, por kjo nuk do të thotë që ne duhet të heshtim për punën e këtyre institucioneve. Janë në dy vjet 2.9 vendime në muaj.; Nuk besoj se është kjo mungesë prej 6 apo 9 këshilltarësh që ka prodhuar këtë rendiment në punën e organeve të VetTing-ut. Në dy vjet janë 140 apelime në Kolegjin e Posaçëm të Apelimit. Janë shqyrtuar dhe dhënë 70 vendime dhe në një mesatare i bie gati 2.9 vendime në muaj.” – u shpreh Ulsi Manja.

Në fund të mbledhjes, Komisioni Parlamentar i Ligjeve miratoi 6 Këshilltarë për Apelin e Vetting-ut dhe 12 për shkallën e parë, Komisionin e Pavarur të Rivlerësimit.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.