Vetting-u rrezikon të mos kryhet brenda afatit – Risku i lartë për shkak të faktorëve politikë e pandemisë, të shtyhet prania e ONM
Ministria e Drejtësisë parashikon se Vetting-u i gjyqtarëve e prokurorëve mund të mos përfundojë deri në vitin 2024, siç është përcaktuar në Kushtetutë. Në draft-strategjinë Ndërsektoriale kundër Korrupsionit për vitet 2021-2025, Ministria e Drejtësisë paralajmëron se rreziku vjen për shkak të faktorëve politikë, por edhe prej problemeve të shkaktuara nga Pandemia Covid 19.
Në strategji, Ministria e përkufizon me risk mesatar humbjen e mbështetjes politike të procesit të rivlerësimit të gjyqtarëve e Prokurorëve. Ajo parashtron edhe veprimet që duhen ndërmarrë në mënyrë që ky risk të ulet: Komunikimi në mënyrë të rregullt i progresit të arritur; MD dhe organet e qeverisjes mbajnë marrëdhënie të ngushta me anëtarët përkatës të Kuvendit dhe partitë politike; dhe së treti gatishmëri për të vlerësuar ndryshimet e kërkuara nga politikanët.
Ndërkohë që edhe më i fortë është rreziku që Pandemia të zvarrisë procesin duke bërë që Komisioni i Pavarur i Kualifikimit të mos kalojë dot në sitë 800 gjyqtarët e prokurorët gjatë mandatit të vet pesë vjeccar. “Procesi i rivlerësimit kalimtar vonohet edhe më tej, p.sh. për shkak të krizës së shkaktuar nga Covid-19 dhe procesi nuk do të përfundojë përpara fundit të mandatit të KPKsë, duke ja lënë KLGJ-së dhe KLPsë për të përfunduar procesin, gjë të cilës ata mund të mos i japin prioritet”, theksohet në Strategji. Për këtë Ministria kërkon Monitorim nëse KPK po funksionon në mënyrë të shpejtë në përputhje me rrethanat, ndërkohë që paralajmëron se Duhet riparë mundësia që ONM të vazhdojë mbikëqyrjen e procesit me të drejtë ankese nëse/kur ajo ndërmerret nga KLGJ dhe KLP.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.