Vetting-u, s’ka kthim pas – Gjonaj: Gjykatat do plotësohen së shpejti, boshllëku i përkohshëm
Shqipëria nuk ka mbetur pa Gjykatë Kushtetuese e Gjykatë të Lartë, po ka shpëtuar njëherë e mirë nga pasojat e kalbëzimit korruptiv të këtyre gjykatave. Kështu është shprehur të martën Ministrja e Drejtësisë Etilda Gjonaj, e cila siguroi se boshllëku është i përkohshëm dhe se këto gjykata do të plotësohen së shpejti me anëtarët e nevojshëm. Gjonaj akuzoi opozitën se po përpiqet të bllokojë me çdo mënyrë procesin e Vetting-ut, i cili sipas saj, garantohet nga ONM, dhe për të cilin nuk ka kthim pas.
“Boshllëku i sotshëm është i përkohshëm, është i kuptueshëm. Njësoj si hapësirat e çliruara nga operacioni në trupin e njeriut, ku kishin gjetur strehë dhe rriteshin tumoret e një kanceri degradues për krejt organizmin. Ky boshllëk do të mbushet më shpejt se sa vonë nga funksionet ripërtëritëse që garanton reforma për këto institucione bazike të drejtësisë. Nuk çon askund as bllokimi i ndryshimeve ligjore për shkollën e magjistraturës, për dhënie e mundësisë të të rinjve për të ndjekur shkollën, të dhënies së mundësisë që të plotësohen vendet, të cilat lirohen nga pastrimi i gjyqtarëve dhe prokurorëve të korruptuar”, u shpreh Gjonaj.
Ajo akuzoi se bllokimi i ndryshimeve ligjore për Shkollën e Magjistraturës nga ana e opozitës, ishte një përpëlitje sa e dëshpëruar, aq edhe e pashpresë për të kthyer mbrapsht Reformën në Drejtësi.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.