Vetting, zhvillohet seanca e parë – Sokol Ibi në pikëpyetje për shtëpinë e blerë nga babai 100 mijë lekë e një Benz

Ka qene Kreu i Gjykatës Administrative Korçë Sokol Ibi emri që ka çelur sezonin e ri të punës për organet e Vetting-ut pas pauzës së plotë në muajin gusht. Ai u paraqit mëngjesin e së hënës përpara Komisionit të Pavarur të Kualifikimit në seancën dëgjimore lidhur me procesin e rivlerësimit të tij, i cili u krye për të tre komponentët: Pasurinë, intergitetin dhe profesionalizmin.

Ishte pasuria dhe standardet profesionale dy pikat ku Kreut të Administratives Korçë ju desh të jepte shpjegime përpara trupës gjykuese.  Pikëpyetjet mbi pasurinë ishin dhe pika ku u ndal më gjatë relatimi i trupës së Vetting-ut.  Ibit ju desh të jepte sqarime mbi një shtëpi me sipërfaqe 127 metra katrorë në Ccërravë të Pogradecit, e cila bashkë me truallin përkatës prej 324 metrash katrorë ishte blerë nga Gjyqtari prej babait të tij për shumën 100 mijë lekë. Paralelisht ai kishte blera nga babai edhe një sipërfaqe toke bujqësore prej rreth 9 mijë metrash katrorë. Edhe në këtë rast, Komisioni vuri në pah paqartësi, duke qenë se në aktin e shitblerjes nuk rezultonte pëlqimi i së motrës, e cila ishte bashkëpronare e 25% të kësaj sipërfaqeje.  Pronat në fjalë kishin paqartësi në vetëdeklarimet e gjyqtarit, ndërkohë që për shtëpinë dhe truallin ekzistonin dy kontrata noteriale të regjistruara në të njëjtën ditë me vlera të ndrsyhme financiare.  Në pikëpyetje ishin edhe dy depozita bankare të hapura nga Ibi përpara nisjes së punës si gjyqtar, ndërkohë që hije dyshimi u ngritën edhe mbi një mjet tip Benz, i cili qe përdorur nga gjyqtari por ishte në pronësi të babait të tij. Komisioni theksoi se babai i gjyqtarit nuk kishte patentë për drejtim mjeti, ndërkohë që rezultonte se edhe sigurimi paguhej nga gjyqtari.

Ndaj Ibit kishin mbërritur edhe disa ankesa nga qytetarë e biznese. Komisioni i Pavarur i Kualifikimit u ndal te një prej tyre e mbërritur në KLD, për shkak të zvarritjes për më shumë se dy vjet të një çështje gjyqësore. Vonesa u konstatuan edhe nga hetimi i vetë KPK-së, sipas së cilës në 8 dosje të shqyrtuara, Gjyqtari kishte kaluar afatet për gjashtë syresh.

Ibi paraqiti një material voluminoz për të justifikuar gjetjet e Trupës së Vetting-ut, ndërkohë që duhen pritur ditët në vijim për të mësuar nëse Komisioni do t’i pranojë arsyetimit e do vendosë për karrierën e tij.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.