Vettingu i administratës shtetërore, ja ku do të përqendrohet – Rama: Përgatitet programi, 6 muajt e parë të 2018 do kemi rezultate

Në konferencën e fundvitit me gazetarët, kryeministri Rama foli edhe investimet që do të kryhen vitin e ardhshëm. Gjatë fjalës së tij kreu i kabinetit qeveritar foli për vettingun në polici, por edhe në administratën shtetërore, ku deklaroi se është bërë gati programi për këtë “pastrim”.

“Reforma në drejtësi është e lidhur edhe me forcimin e rendit ligjor ekonomik, patjetër do të sjellë frute të dobishme. Në këtë drejtim vitin e ardhshëm kemi arsye për të qenë optimistë, për nisjen e disa investimeve të rëndësishme, si aeroporti i ri i Vlorës, po ashtu disa investime të rëndësishme në turizëm dhe patjetër në energjetikë. Ndërkohë që e përsëris, programi ynë “1 miliard” për rindërtim do të jetë një instrument për rritjen e punësimit dhe rritjen ekonomike”, u shpreh kryeministri.

Më tej ai foli edhe për vettingun në administratën shtetërore ku ka përjashtuar administratën publike, duke deklaruar se është një sistem i garantuar. Sipas tij ky “pastrim” ka të bëjë me rastet kur diploma e fituar nuk përputhet me vendin e punës, apo kur rekrutimet janë bërë me letra false.

“Vettingu në polici do të nisë në Janar, është përgatitur baza për zbatimin e tij. Kemi përgatitur edhe bazën për të bërë një vetting në administratën shtetërore, jo për administratën publike, për shërbimin civil, pasi është një sistem i garantuar dhe ka baza shumë të favorshme për t’u forcuar. Po  flas për pjesën tjetër të administratës, për të pastruar të gjitha ato raste ku diploma nuk përputhet me vendin e punës, apo kur bëhet fjalë për rekrutimin me letra false. Për këtë kemi përgatitur një program dhe në 6 mujorin e parë të vitit të ardhëm do të bëhet një pastrim i rëndësishëm në këtë aspekt”, deklaroi Rama.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.