Vettingu në polici, Rama: Proces historik, do të nisë nga muaji Janar. Xhafaj: Buxheti i 2018, më i larti për sigurinë dhe rendin në 10 vite
Vettingu në radhët e punonjësve të policisë, i cili pritet të nisë nga muaji janar, do të japë rezultate. Kështu është shprehur kryeministri Rama gjatë një konference në Akademinë e Sigurisë, ku ndër të tjera theksoi se pastrimi në radhët e policisë dhe integriteti i punonjësve në këto institucione është parakusht.
“Pastërtia në radhët e punonjësve të policisë dhe integriteti i punonjësve të këtyre institucioneve është parakusht për qeverinë. Kemi ndërmarrë masa për shpërblimin e punonjësve të policisë do të vazhdojmë të bëjmë më shumë në këtë aspekt. Procesi i historik i pastrimit në policinë e shtetit dhe në sistemin gjyqësor do të vijojë me vendosmëri. Jam i bindur se procesi i vettingut i organizuar dhe që do të fillojë të zbatohet në policinë e shtetit nga muaji janar do të japë rezultate të qenësishme”, u shpreh Rama.
Kreu i qeverisë në këtë takim foli edhe për reformat në fushën e sigurisë, ku u shpreh se ajo përbën një të mirë publike dhe nuk mund të lihet në dorë të sektorit privat.
“Reforma në fushën e sigurisë është një ndër më te rëndësishmet, shteti ka një sërë përgjegjësish në funksion të qytetarëve. Siguria është një e mirë publike që nuk krijohet nga aktorët privatë sepse siguria nuk shitet dhe nuk blihet. Kjo natyrë e posaçme e bën sigurinë publike produktin më të veçantë dhe e ka për detyrë ta ofrojë shteti. Së pari siguria publike nuk mund të krijohet nga qasje apo procese të izoluara. Kjo e thellon procesin e krijimit të kapaciteteve dhe krijon një përpjeke të përbashkët të institucioneve në funksion të sigurisë”, u shpreh Rama.
Kryeministri u ndal tek përpjekjet që ka ndërmarrë qeveria në luftën kundër krimit, duke përmendur edhe operacionin “Forca e Ligjit”.
“Përvoja e shkëlqyer me krijimin e disa Task-Forcave janë një provë e pakundërshtueshme për sinergji ndërmjet aktorëve të ndryshëm. Ne do te përpiqemi të kalojmë në një nivel të ri koordinimi për krijimin e mekanizmave të përhershëm për këtë qellim. Modernizimi i vazhdueshëm, i strukturave ligjzbatuese është një prioritet. Akademinë e Sigurisë do të vazhdojmë ta mbështesim dhe ta ngremë në një nivel te ri, duke mundësuar një revolucion të vërtetë në kurrikula dhe metodologji, që duhet të udhëhiqen nga pedagogët. Do vijojmë të godasim dhe shkatërrojmë grupet kriminale. Operacioni forca e ligjit si një ndërmarrje e rëndësishme, do të synojë katet më të larta dhe nyejt me te thella të krimit të organizuar. Janë në shënjestër asetet financiare me origjinë kriminale”, tha Rama.
Nga ana e tij ministri i Brendshëm Fatmir Xhafaj u ndal te buxheti për ministrinë e Brendshme ku tha rritja e tij është një tregues i qartë i qeverisë për jetësimin e prioriteteve madhore.
“Ky është buxheti më i lartë në fushën e rendit dhe sigurisë në 10 vitet e fundit. Rritja fokusohet te policia e shtetit dhe do të përdoret për investime në fushën e hetimit dhe në pajisje shkencore. Hetimi për veprat penale kërkon një sintezë te mirëbalancuar. Mbeten kritike procedurat e kërkimit. Organet e hetimit duhen mbështetur me të dhëna shkencore”, u shpreh Xhafaj.
Ministri u ndal edhe në reformimin e Akademisë se Sigurisë, ku u shpreh tashmë ka një model transparent konkurrimi dhe rritje të cilësisë në programe dhe kurrikula.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.