[Video] Pas punimeve për gazsjellësin toka rikthehet në gjendjen e mëparshme
Kompania TAP që po ndërton në vendin tonë gazsjellësin që lidh Azerbajxhanin me Italinë dhe pjesën tjetër të Europës është duke punuar për kthimin e tokës në gjendjen e mëparshme në zonat ku ka kaluar, në Shqipëri dhe Greqi.
Sipas vetë kompanisë, punimet po ecin sipas parashikimit, ndërsa deri më tani janë rehabilituar mbi 45% e gjithë gjurmës së TAP. Kjo do të thotë se janë gati 350 kilometra, nga 765 kilometra totale, që kanë “zhdukur” shenjat e kalimit nëntokë të tubacioneve..
Siç duket edhe në video, gjithçka që mbetet për të kujtuar se nën tokë ka një tubacion gazi janë vetëm disa shtylla me ngjyrë të verdhë.
Krahas kthimit në gjendjen e mëparshme, kompani ka marrë masa edhe në vendet që kanë dashur ndërhyrje për të parandaluar rrëshqitjen e dherave.
Në fillim të muajit Nëntor, konsorciumi njoftoi se janë lidhur mbi 78% e tubave në Shqipëri dhe Greqi, ndërsa investimet në vendin tonë për periudhën 2017-2018 arrijnë në 800 milionë euro.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.