Vidhen kriptovaluta në Japoni – Vlera arrin në $530 mln, rregullatorët nisin hetimin e bursave

Rregullatori financiar në Japoni, bëri të ditur se do të hetojë të gjithë bursat e kriptovalutave dhe urdhëroi njërën prej tyre, Coincheck, që të japë shpjegim, ndërkohë që hakerat vodhën monedha në vlerën e 530 milionë dollarëve.

Kjo vjedhje vë në dukje cënueshmërinë në tregtimin e aktiveve që politikëbërësit globale po përpiqen që ta vënë brenda kuadrit rregullator.

Agjencia e Shërbimeve Financiare në Japoni, urdhëroi përmirësime në operacionet e bursës në Tokio, Coincheck, që pezulloi tregtinë e të gjithë kriptovalutave përveç Bitcoin ditën e Premte.

Coincheck deklaroi gjatë fundjavës se do të riktheje rreth 90% të shumës nëpërmjet fondeve të brendshme, por nuk dha detaje mbi mënyrën dhe kohën.

Vjedhja ka sjellë vëmendjen te përpjekjet e Japonisë në rregullimin e bursave të kriptovalutave. Vitin e kaluar, Japonia u bë vendi i parë në botë që fut këto bursa në kuadrin rregullator në nivel kombëtar, një lëvizje që mori vlerësime nga bota për nxitjen e inovacionit dhe mbrojtjen e konsumatorit.

Japonia nisi të kërkojë operatorët e bursave për kriptovalutat që të regjistrohen në Prill 2017,  duke lejuar operatorët ekzistues që të vazhdojnë ofrimin e shërbimeve pa bërë regjistrimin formal.   Agjencia e Shërbimeve Financiare ka regjistruar deri më tani 16 bursa të kriptovalutave, ndërkohë që shumë të tjera presin miratim.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.