Vijon ngërçi politik në Itali – Mattarella preferon një qeveri neutrale të përkohshme, jo zgjedhje

Presidenti i Italisë, Sergio Mattarella, në përpjekje për të zgjidhur ngërçin 2 mujor politik, i dha partive 2 opsione; caktimin e një ekzekutivi neutral të përkohshëm për të drejtuar vendin deri më 31 Dhjetor apo kthimin drejt kutive të votimit. Mattarella shpjegoi avantazhet e opsionit të parë dhe disavantazhet e të dytit. Një qeveri neutrale e caktuar nga ai, do të mund të kalonte ligjin e buxhetit dhe një ligj të ri elektoral, duke krijuar mundësinë e zgjedhjeve në fillim të 2019-ës.

Sipas Mattarella, ekzekutivi do të linte detyrën, nëse liderët politikë arrijnë një mazhorancë në parlament përpara fundvitit.  Presidenti i bëri këto komente pas dështimit në arritjen e një dakordësie mes 3 pretendentët që dolën nga zgjedhjet e 3 Marsit,  ku asnjë prej të cilëve nuk fitoi mjaftueshëm vota për të krijuar një qeveri të vetën. Në kundërpërgjigje, pjesa më e madhe e bllokut të qendrës së djathtë dhe lëvizjes 5 yjet,  bënë të ditur se favorizojnë zgjedhjet e reja këtë vit.

Megjithatë, sipas raportimeve, Partia Demokratike mbështet propozimin e presidentit për një qeveri neutrale të përkohshme. Mattarella paralajmëroi se nëse partitë këmbëngulin për zgjedhje të reja gjatë Verës, vendi do të përballej me rreziqe të mëdha politike dhe ekonomike.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.