Vijon puna për rikonstruksionin e gjimnazit “Andon Zako Çajupi” – Veliaj: Një tjetër shkollë shpëton nga ngarkesa e klasave me dy turne

Vijojnë punimet për rikonstruksionin e shkollës së mesme “Andon Zako Çajupi”. Kryebashkiaku, Erion Veliaj, gjatë inspektimit të punimeve tha se kjo është një nga shkollat me investimet më të mëdha në Bashkinë e Tiranës.

“Shkolla “Çajupi” është një nga shkollat me investimet më të mëdha të Bashkisë së Tiranës. Është një investim i arritur falë miradministrimit të fondeve të bashkisë, pasi nuk ishte në radhë për këtë vit, por për vitin tjetër. Pikërisht se arritëm të mblidhnim të ardhura, falë edhe miradministrimit, në shkollën “Çajupi” po bëjmë investimin më të madh që ka parë shkolla që nga ndërtimi i saj”, tha Veliaj.

Ndërkohë, Veliaj shtoi më tej se falë kësaj ndërhyrje do të bëhet e mundur edhe shmangia e mësimit me dy turne.

“Shkolla është ndërtuar nga e para, i kemi shtuar disa pjesë, të cilat na kanë dhënë 9 klasa të reja, duke mënjanuar sot e mot klasat me dy turne. I kemi shtuar një palestër të re dhe sigurisht, edhe terrenet sportive dhe laboratorët. Ndaj, më vjen mirë që edhe një tjetër shkollë shpëton nga makthi, stresi dhe ngarkesa e klasave me dy turne, madje ka edhe hapësirë që të akomodojë rritjen demografike të zonës në të ardhmen”, u shpreh ai.

Për të shmangur mbipopullimin në klasa, krybashkiaku u ka bërë apel prindërve që të regjistrojnë fëmijët e tyre në shkollën më të afërt, pasi sipas tij të gjitha shkollat ofrojnë standarde mësimdhënieje dhe kushte shumë të mira.

Ai është ndalur gjithashtu edhe te çështja e Tetarit Kombëtar, duke shprehur bindjen se Tirana do të ketë një Teatër të Ri, ashtu siç në këto tre vite ka pasur një Shesh të ri, Pazar të ri, parqe e shkolla të reja.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.