Vijon pyllëzimi i Tiranës – Veliaj: Më 21 mars arrijmë targetin e 100 mijë pemëve të mbjella

Një mijë pemët e djegura nga zjarret që ranë verën e kaluar në zonën e Hekalit, në Njësinë Administrative të Petrelës, u zëvendësuan  me 2 mijë fidanë të rinj, duke rigjeneruar bimësinë e zonës përreth. Në 95-vjetorin e Shërbimit Pyjor Shqiptar, Bashkia e Tiranës dhe Agjencia e Parqeve dhe Rekreacionit organizuan aksionin për mbjelljen e fidanëve të rinj. Kreu i Bashkisë së Tiranës deklaroi se falë këtij ritmi, deri më tani në gjithë kryeqytetin janë mbjellë mbi 85 mijë pemë të reja.

“Duhet ta ruajmë, të jemi të kujdesshëm, të lajmërojmë menjëherë në momentin që ka zjarr dhe duhet të pranojmë se jetojmë në kushtet e një ndryshimi klimaterik, ku dimri do të ketë gjithmonë të papritura dhe vera do të jetë gjithmonë e më e nxehtë. Për sa kohë që jemi të përgatitur, si për të përballuar fatkeqësitë, por edhe për të rikuperuar dëmin, jemi në rrugën e duhur. Sot me 2 mijë fidanë rikuperojmë dy herë atë që është djegur. U dogjën 1 mijë pemë, mbjellim 2 mijë fidanë. Sot shkojmë në mbi 85 mijë pemë ”, nënvizoi Veliaj.

Bashkia e Tiranës ka cilësuar si objektiv përfundimtar mbjelljen e 100 mijë pemëve deri më 21 mars. Aktualisht janë mbjellë rreth 85 mijë pemë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.