Villeroy mbi rregullat bankare: “Të nisin bisedimet për kapitalin, tërheqja e SHBA do të ketë pasoja”

Anëtari i këshillit drejtues të Bankës Qendrore Europiane, Francois Villeroy, tha se rregullatorët ndërkombëtarë të bankave duhet të nisin bisedimet mbi kërkesat për kapitalin minimal dhe shtoi se tërheqja e Shteteve të Bashkuara nga rregullat ekzistuese do të ketë pasoja serioze.

“Për bankat, prioriteti qëndron te stabilizimi i rrjetit rregullator. Për rrjedhojë duhet të përfundojmë Basel III”, tha Villeroy, që është edhe Guvernatori i Bankës Qendrore të Francës.

Bisedimet kanë ngecur në propozimin e një dyshemeje, ku kapitali nuk mund të bjerë poshtë 75% sipas qasjes standarde të caktuar nga rregullatorët dhe që përdoret nga shumica e huadhënësve.  Duke folur si kreu i rregullatorit të sektorit financiar në Francë, Villeroy tha në një konferencë në Paris se dyshemeja në atë nivel është e papranueshme dhe se duhet një dakordësi në një nivel më të ulët por me mbikëqyrje më strikte të modeleve të brendshëm të vlerësimit të bankave.

Villeroy shprehu shqetësim mbi përpjekjet për shpërbërjen e rregulloreve në SHBA. “Një de-rregullim vetëm nga një palë, do të ishte humbje për stabilitetin e sistemit global financiar dhe për konkurrencën mes bankave amerikane dhe Europiane”, tha Villeroy.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.