Virusi kinez mbërrin në SHBA/ CDC konfirmon rastin e parë. Numri i vdekjeve rritet në 9!
Qendra e Kontrollit dhe Parandalimit të Sëmundjeve në SHBA (CDC), konfirmoi rastin e parë të koronavirusit që ka prekur qindra persona në Kinë dhe ka vrarë 9 deri më tani.
Një banor në Washington që po kthehej nga Kina më 15 Janar, u diagnostikua me koronavirusin e Vuhanit, sipas autoriteteve të shëndetit public në SHBA. Autoritetet bënë të ditur se pacienti është i shëndetshëm, është izoluar në një qendër mjekësore në Washington dhe përbën pak rrezik ndaj publikut.
Qendra e Kontrollit të Sëmundjeve theksoi se pacienti i’u drejtua një spitali lokal javën e kaluar, pasi i’u shfaqen simptoma të pneumonisë.
Deri të Mërkurën, autoritetet kineze konfirmuan personin e 9 të vdekur nga virusi. Zyrtarët e Shëndetit Publik thonë se ka mbi 400 raste të sëmundjes, që ka rikujtuar virusin SARS që i përhap në vitin 2003. Pacientë të infektuar me virusin janë raportuar edhe në Tajlandë, Korenë e Jugut, Japoni dhe Tajvan. Megjithatë, autoritetet deklaruan se rreziku i përhapjes në publikun amerikan është i ulët.
Organizata Botërore e Shëndetësisë ka zhvilluar një takim emergjencë për të vendosur se si do të trajtohet përhapja e virusit të ri kinez.
Koronaviruset janë një familje e madhe e viruseve që infektojnë zakonisht kafshët, por që në disa raste mund të zhvillohen dhe përhapen edhe tek njerëzit. Simptomat përfshijë temperaturë, kollitje dhe probleme me frymëmarrjen.
Qendra e Kontrollit dhe Parandalimit të Sëmundjeve në SHBA bëri të ditur se njerëzit mund të mbrohen nga virusi duke larë duart, shmangur prekjen e syve, hundës dhe gojës si dhe duke qëndruar larg personave të sëmurë. Shumë kinezë kanë blerë maska për t’u mbrojtur nga infektimi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.