Visa do të blejë suedezen Tink / Marrëveshje prej 2.2 mld USD për platformën e të dhënave financiare

Visa deklaroi se ka rënë dakord të blejë për 1.8 miliardë euro (2.2 mld $) platformën europiane të bankingut Tink, pak muaj pasi braktisi blerjen e planifikuar të startup-it rival Plaid.  Firma suedeze Tink, e themeluar në vitin 2012, lejon bankat dhe firma të tjera financiare që të aksesojnë të dhënat financiare të konsumatorit më lehtë.  Tink përdoret nga mbi 3,400 banka dhe institucione të tjera si dhe mbi 250 milionë konsumatorë në Europë. Visa u detyrua të ndalojë blerjen prej 5.3 miliardë dollarë të platformës amerikane të të dhënave Plaid në muajin Janar, pas një padie të qeverisë amerikane që synonte të bllokonte marrëveshjen për motive të mbrojtjes së konkurrencës.  Visa bëri të ditur se marrëveshja me Tink është subjekt i miratimit rregullator. Rregullat e Bashkimit Europian për “open banking” që janë përshtatur edhe nga Britania përpara se të dilte nga blloku, i kërkojnë bankave që të lejojnë akses drejt të dhënave të klientëve ndaj ofruesve palë të treta të regjistruar, për të nxitur konkurrencën.  Prezantimi i këtyre rregullave ka qenë pozitiv për kompanitë  e teknologjisë financiare, si Tink i Suedisë, që ofrojnë teknologji për të ndihmuar palët e tretë dhe bankat që të aksesojnë të dhënat e konsumatorëve.  Visa  do të ruajë ekipin e markës dhe manaxhimit të Tink dhe selia do vazhdojë në Stockholm.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.