Vit i vështirë për kafenë braziliane. Montesanto pret rënien e prodhimit me 23% dhe rritjen e çmimit

Brazili, kultivuesi dhe eksportuesi më i madh në botë i kafesë, pritet të prodhojë 52.9 milionë thasë prej 60 kg në vitin 2021, apo 23% më pak se të korrat rekord prej 68.1 milionë thasë në vitin 2020, sipas eksportuesit “Grupo Montesanto Tavares”. Sipas vlerësimeve të kompanisë, prodhimi brazilian i kafesë arabike do të bjerë me 37% në 31.23 milionë thasë, ndërsa prodhimi i kafesë robusta, pritet të rritet me 17% në 21.67 mln thasë.

Brazili po hyn në vitin e fundit të ciklit 2-vjeçar të prodhimit për kafenë arabike. Megjithatë, kultivuesit dhe hulumtuesit presin që prodhimi të bjerë më shumë se sa pritej në vitin 2021, për shkak të një thatësire të gjatë në vitin 2020, që sipas tyre ka dëmtuar periudhën kryesore të çeljes, ç’ka ka ulur potencialin e prodhimit. Montesanto Tavares kontrollon ferma, firma të eksportimit dhe të tregtimit të kafesë në Brazil, SHBA dhe Europë.

Kompania është një ndër eksportuesit më të mëdhenj të kafesë braziliane dhe ka furnizuar rreth 2.4 milionë thasë në vitin 2020. Presidenti i kompanisë, Ricardo Tavares, pret që çmimet ndërkombëtare të kafesë të rriten në vitin 2021, për shkak të ofertës më të vogël në Brazil. Çmimi i kafesë arabike në Nju Jork ka qenë i qëndrueshëm, duke e mbyllur vitin 2020 me thuajse të njëjtin nivel që e nisi.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.