Viti i Ri 2018, këtë vit me më shumë fishekzjarrë, lodra e dhurata për shqiptarët
Duket se për Vitin e Ri 2018, shqiptarët janë përgatitur më mirë se vitet e fundit. Të paktën sipas të dhënave të Drejtorisë së Përgjithshme të Doganave, elementët që karakterizojnë një festë fundviti të suksesshme kanë regjistruar një rritje të importeve përgjatë këtij viti.
Fishekzjarret dhe produktet e tjera piroteknike, një nga traditat e shqiptarëve pasi akrepat e orës mbërrijnë mesnatën, duket se do të jenë në sasi më të mëdha në treg se sa gjatë 5 viteve të fundit. Në grupin e mallrave “Eksplozivet, prodhimet piroteknike, shkrepëset, etj.”, vendi ynë ka importuar gjatë 10-muajve të parë të vitit rreth 524 milionë lekë në vlerë mallrash, 86 milionë lekë më shumë se një vit më parë dhe më shumë se sa të gjithë vitet, duke nisur nga ai 2013.
Ndonëse ky grup nuk përfshin vetëm fishekzjarrët dhe kapsollat, një rritje e tillë e volumit të importeve nënkupton një prezencë të sigurt të shtuar në treg për këto produkte.
Po ashtu, siç ka raportuar edhe më parë SCAN, edhe lodrat kanë shënuar një rritje importesh domethënëse gjatë këtij viti. Janë 1.7 miliardë lekë në vlerë mallrash të importuara këtë vit, kundrejt 1,2 miliardë lekëve të një viti më parë.
E teksa dhuratat për më të vegjlit duket do të kenë një rritje të ndjeshme, po ashtu pritet rritje e dhuratave për të rriturit.
Veshjet, e sidomos ato për muajt e ftohtë të vitit, pra peliçet apo palltot prej gëzofi e xhaketat prej lëkure kanë regjistruar po ashtu një shtim të importeve. Artikujt prej lëkure janë importuar 12,6% më tepër, gëzofët janë rritur me 5%, ndërsa në përgjithësi veshjet e këpucët janë importuar 14,3% më shumë vetëm gjatë muajit të kaluar.
Përveç veshjeve, këtë vit duket se do të ketë më shumë shqiptarë që dhurojnë bizhuteri. Perlat natyrale dhe të kultivuar, si edhe gurët e çmuar e gjysmë të çmuar, këtë vit kanë regjistruar një rritje importesh prej 7,1% ndaj një viti më parë, duke arritur vlerën gati 1.1 miliardë lekë, pothuajse dyfishin e vitit 2013.
Këtë vit vihet re një prezencë e shtuar në importe edhe për dhuratat e tjera më specifike si orët, veprat e artit, orendi, aparate fotografikë, celularë e pajisjeje të tjera elektronike.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.