Vizitorët e huaj – Dominon rajoni me 75% të numrit total
Numri i shtetasve të huaj që vizituan Shqipërinë u rrit përsëri në muajin janar, duke sinjalizuar një tendencë pozitive të turizmit edhe në fillimin e këtij viti.
Sipas Institutit të Statistikave, në Shqipëri hynë 232 mijë shtetas të huaj, në rritje me 34.5% krahasuar me të njëjtën periudhë të një viti më parë.
Hyrjet në Shqipëri dominohen prej vizitorëve nga vendet fqinje, kryesuar nga Kosova, Maqedonia, Greqia e Mali i Zi. Vizitorët prej këtyre vendeve përbënin rreth 75% të numrit të përgjithshëm të vizitorëve të huaj gjatë janarit.
Vizitat nga vendet fqinje, sidoqoftë, në pjesën më të madhe lidhen me udhëtime pune dhe tregtie, më shumë sesa me qëllime të mirëfillta turistike.
Megjithatë, edhe numri i vizitorëve nga shtetet e tjera, si Anglia, Gjermania apo Shtetet e Bashkuara paraqitet në rritje, pavarësisht peshës ende të ulët që zënë kundrejt numrit total të vizitorëve.
Ndërkohë, me ritme të larta po rritet edhe numri i vizitave të shqiptarëve jashtë shtetit. Sipas Instat, për janarin u regjistruan 448 mijë dalje të shtetasve shqiptarë, afro 21% më shumë krahasuar me një vit më parë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.