“Vjosa të shpallet park kombëtar” – Meta, apel qeverisë: Mundësi për zhvillimin ekonomik të qëndrueshëm
Pas refuzimit të lejes mjedisore që do i hapte rrugë ndërtimit të hidrocentralit të Kalivaçit, presidenti Ilir Meta kërkon nga qeveria shpalljen Park Kombëtar Lumor të pjesës lumore të mesme të Vjosës, si një formë për ta mbrojtur nga ndërtimi i digave. Kërkesa e Metës u bë gjatë Forumin Ndërkombëtar të organizuar nga Konfindustria Shqiptare për shpalljen e nismës së Strategjisë së Zhvillimit të Qëndrueshëm Ekonomik të lumit Vjosa dhe pellgut ujëmbledhës të tij.
“Shpallja e Parkut Kombëtar Lumor të rrjedhjes së mesme të lumit Vjosë do ta kthente vërtet pellgun lumor të Vjosës të veçantë nga ana e mundësive të zhvillimit ekonomik të qëndrueshëm. Duke filluar nga turizmi veror, tek turizmi natyror, ekologjik, agroturizmi apo edhe turizmi kulturor, historik, arkeologjik, që i gjithë lumi Vjosa dhe degët e tij ofrojnë përgjatë gjithë gjatësisë së tij. Është krejt e papranueshme, që zona dhe krahina kaq të bukura dhe të pasura, që aq shumë vlerësohen nga turistë dhe shkencëtarë të Europës, të shkretohen dhe braktisen nga banorët”, tha Meta.
Sipas Metës, Strategjia e Zhvillimit të Qëndrueshëm të Basenit të Lumit Vjosa krijon kushtet për rritjen e efektivitetit të përdorimit të fondeve buxhetore të qeverisë, bashkive, biznesit dhe individëve.
“Gjithashtu, Strategjia krijon kushtet më të mira të mundshme, që të tërhiqen financime dhe investime të rëndësishme nga donatorë, institucione financiare ndërkombëtare dhe të programeve të BE-së, sepse Vjosa nuk është vetëm e Shqipërisë, por e gjithë Europës”, u shpreh Meta.
Lumi Vjosa është një ndër lumenjtë e fundit të egër në Evropë, duke rrjedhur i pandërprerë nga hidrocentralet përgjatë gjithë rrjedhës së tij. Qeveria firmosi në vitin 2016 koncesionin për ndërtimin e hidrocentralit të Poçemit, ndërsa në vitin 2018 koncesionin për HEC Kalivaç. Ndërkohë që, prej kohësh, ekspertët këshillojnë gjetjen e burimeve alternative për prodhimin e energjisë, sikurse është dielli apo era, duke shmangur në këtë mënyrë dhe varësinë që ka vendi ynë nga burimet hidrike.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.