Vlerësimi i kreditit për Kinën, S&P: Të 3 agjencitë kanë vlerësim të lartë, nuk ka mbledhje emergjente

Agjencia e Vlerësimit të kreditit Standard & Poors, deklaron se nuk do të zhvillojë mbledhje emergjente për Kinën dhe do të ndjekë  itinerarin e rregullt të rishikimit të vlerësimit për vendin.

Komentet vijnë pas zhvlerësimit nga agjencia “Moody’s”, që e çoi në të njëjtin nivel me “Fitch Ratings”.

Kjo e vendos Standard & Poor’s sipër dy agjencive, duke mbajtur një vlerësim prej AA1 me perspektivë negative, që e ka mbajtur që prej Marsi 2016.

“Moody’s” zhvlerësoi borxhin sovran të ekonomisë së dytë më të madhe në botë në A1, duke përmendur dobësimin e fuqisë financiare në vitet që vijnë.

“Fitch”, mbajti vlerësimin A+ të Premten e kaluar, duke theksuar politikat e forta makroekonomike. Ekspertët e Standard & Poor’s thonë se pavarësisht zhvlerësimit nga “Moody’s”, të tre agjencitë kryesore kanë vlerësime të larta për Kinën.

Stimujt qeveritarë kanë qenë nxitësit kryesorë të ekonomisë kineze në vitet e fundit. Megjithatë, kjo ka sjellë edhe rritjen e nivelit të borxhit në rreth 300% në raport me Produktin e Brendshëm Bruto.

“Standard & Poors” deklaron se agjencitë e tjera shqetësohen në terma afat-gjatë, pasi nëse trendi vazhdon në këtë formë, rreziku financiar do të rritet në një nivel që do të sjellë edhe zhvlerësime të tjera.

S&P ndryshoi për herë të fundit vlerësimin e borxhit sovran të Kinës në vitin 2010, ku e rriti me një gradë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.