Vlerësimi për nivelin e jetesës – Në 3 vjet shqiptarët nuk ndryshuan mendim, Kosova udhëheq botën

Nga viti 2014 në vitin 2017, për shqiptarët jeta nuk pati ndonjë ndryshim të perceptueshëm. Pohimi vjen nga sondazhi botëror i Gallup për vlerësimin e jetës së njerëzve, i kryer në 115 shtete.

Vendi ynë është i përfaqësuar në hartën e ndryshimit në figurë me një ngjyrë gri të lehtë, çka do të thotë se ka patur shumë pak ose aspak ndryshim në notën që vetë shqiptarët i japin standardit të tyre të jetesës.

Këto të dhëna i bashkangjiten përllogaritjeve të Produktit të Brendshëm Bruto për frymë, i cili në 3 vjet ka shkuar nga 466 mijë lekë në pak mbi 500 mijë lekë dhe janë pjesë e disiplinës së quajtur ekonomi e sjelljes, një teori fituese e çmimit Nobel që thotë se 30% e asaj çfarë njerëzit bëjnë është racionale, ndërsa 70% është emocionale.

Një shembull i kësaj teorie janë rezultatet e Greqisë dhe Spanjës, ku para 10 vitesh 44% e grekëve shpreheshin se jetët e tyre ishin mjaftueshëm pozitive për t’u quajtur në lulëzim, por pas viteve të shumta të recesionit dhe masave të shkurtimit të buxhetit, në vitin 2017 vetëm 19% e grekëve ndihen se po lulëzojnë.

Rëniet më të mëdha në këtë indeks  për 10 vitet e fundit i takojnë pas Greqisë me 25%, Spanjës dhe Egjiptit me përkatësisht 22 dhe 17 pikë përqindje.

Ndërkohë, shteti me rritjen më të madhe të vlerësimit të jetës në 3 vitet e fundit është Kosova me 25%. Megjithatë duhet thënë se vlerësimi është ende shumë i ulët, me vetëm 36% të njerëzve që shprehen se jetët po lulëzojnë. Megjithatë, Gallup cilëson se matja në Kosovë u bë në mes të zgjedhjeve parlamentare.

Rezultatet e sondazhit bazohen në intervista me telefon dhe kokë më kokë me rreth 1 mijë të rritur në secilin shtet.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.