Volvo vonon listimin në bursë – Tensionet tregtare dhe ngadalësimi i industrisë, prishin planet
Volvo dhe kompania zotëruese kineze, Geely, deklaruan se kanë shtyrë planet për t’u listuar në bursën e Stockholmit, prej tensioneve tregtare dhe performancës së dobët të industrisë së makinave në tregje.
“Kemi arritur në përfundimin se nuk është momenti i duhur për të ndërmarrë ofertën publike fillestare”, deklaroi kreu ekzekutiv Hakan Samuelsson. Volvo dhe kompania zotëruese kineze kanë diskutuar prej kohësh për një ofertë publike fillestare që do të vlerësojë kompaninë në 16-30 miliardë dollarë.
Volvo deklaroi se një listim në bursë mund të ndodhë në të ardhmen. Por, sipas kreut ekzekutiv, perspektiva është zbehur, ndërkohë që të gjithë aksionet e prodhuesve të makinave kanë pësuar rënie për këtë vit.
Lufta tregtare mes Washingtonit dhe Pekinit, si dhe tensionet me Europën, kanë përhapur panik te investitorët. Volvo është më pak e ekspozuar se rivalët gjermanë ndaj tarifave, megjithatë, ka bërë të ditur se do të reduktojë prodhimin e modelit XC60, për të minimizuar kostot.
Geely, që e bleu Volvon nga gjiganti amerikan Ford, për 1.8 miliardë dollarë në vitin 2010, ka blerë gjithashtu aksione te prodhuesi i Mercedes, Daimler.
Sipas kësaj të fundit, Volvo duhet të synojë lidhje më të forta me tregun kinez përpara se të listohet në bursë. Volvo ka shitur 61,480 makina në Kinë gjatë gjysmës së parë të vitit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.