Votimi i Brexit shtyhet në Janar – May akuzohet për shkurtimin e ditëve që përfundojnë në 29 Mars
Kryeministrja e Britanisë, Theresa May, tha se do të rikthejë Brexit në parlament në një votim në muajin Janar dhe premtoi se do të marrë siguri nga Bashkimi Europian deri më atëherë.
Ndërkohë që vetëm 100 ditë kanë mbetur nga dalja e Britanisë, Theresa May u përball me akuza nga deputetët se po përpiqet të detyrojë parlamentin e ndarë që të votojë marrëveshjen e saj, duke shkurtuar ditët që mbeten deri në dalje.
Vota në mes të muajit Janar, mund të detyrojë deputetët që të zgjedhin mes marrëveshjes së saj apo daljes pa marrëveshje më 29 Mars, që përbën një skenar të frikshëm për bizneset.
Theresa May ka mbrojtur marrëveshjen e saj për të dalë nga Europa, duke hedhur poshtë thirrjet për një referendum të dytë dhe mos testuar opinionet e ndryshme në parlamentin britanik.
Kryeministrja tha se parlamenti do të disuktojë në Janar dhe votimi do të ndodhë në javën që nis më datë 14, më shumë se 1 muaj nga afati origjinal i 11 Dhjetorit që ajo e anuloi.
Pas një jave sfiduese ku ajo i mbijetoi mocionit të mosbesimit në partinë e saj konservatore, May tha përsëri se alternativa e paketës së saj të Brexit është dalja pa marrëveshje nga Europa.
“E kuptoj që kjo nuk është marrëveshja perfekte për të gjithë. Është një kompromis. Por nëse fokusohemi te marrëveshja perfekte do rrezikojmë të dalim pa marrëveshje nga Europa. Shmangja e këtij skenari është e mundur vetëm nëse ne arrijmë në një dakordësi apo duke braktisur fare Brexit”.
Kryeministrja tha se Bashkimi Europian ka ofruar qartësi në pikat më të vështira të marrëveshjes dhe se Qeveria po kërkon siguri politike dhe ligjore.
Ndërkohë që Bashkimi Europian nuk ka gjasa të ofrojë lehtësimet që kërkon parlamenti britanik, shumë politikanë po mbështesin idenë e një referendumi të dytë.
May dhe ministrat e saj kanë hedhur poshtë vazhdimisht opsionin e një referendumi të dytë, duke thënë se do të tradhtonte votuesit e Qershorit 2016.
Kjo rrit rrezikun e daljes pa marrëveshje, skenar që disa biznese kanë thënë se do të ketë pasoja katastrofike për ekonominë e 5-të më të madhe në botë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.