Votohen të enjten – Marrëveshjet e huasë, 87 milionë euro investime në zonën e Jugut
Komisioni Parlamentar i Ligjeve miratoi marrëveshjet e huasë mes qeverisë shqiptare dhe Bankës Ndërkombëtare për Rindërtim dhe Zhvillim për financimin e projektit për zhvillimin e integruar urban dhe të turizmit, si dhe financimin e programit të menaxhimit të mbetjeve të ngurta, rajoni Vlorë.
Dy projektet kanë një kosto të përafërt prej 87 milionë eurosh. Kreu i Fondit të Zhvillimit Kombëtar të Rajoneve Benet Beci, tha se marrëveshja me BNRZH pritet të nxisë konkurrencën dhe rritjen ekonomike përmes zhvillimit të turizmit dhe investimeve në infrastrukturë.
Ndërsa përfaqësuesit e Ministrisë së Transporteve sqaruan se marrëveshja mes qeverisë shqiptare dhe KfW Frankfurt për financimin e programit të menaxhimit të mbetjeve të ngurta në rajonin e Vlorës, ka një kosto prej rreth 24 milionë eurosh.
I pyetur nga TV SCAN kryetari i Komisionit të Ligjeve, Fatmir Xhafaj, tha se marrëveshjet e huasë janë diskutuar në komisionet përgjegjëse dhe do të përfshihen në rendin e ditës për t’u votuar në seancën plenare të ditës së enjte.
Florenc Drizari/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.