Vrulli i ekonomisë gjermane – Ministria e Ekonomisë pret një ngadalësim të lehtë në gjysmën e dytë
Trendi pozitiv i ekonomisë gjermane është zgjeruar dhe pritet tashmë të vazhdojë edhe në gjysmën e dytë të këtij viti.
Megjithatë, ekonomia ka gjasa të humbasë pak vrull pas performancës së fortë në 6 muajt e parë, sipas ministrisë së Ekonomisë në Gjermani. Ekonomia më e madhe e Europës po përfiton nga një rimëkëmbje e nxitur nga konsumi, ndërkohë punësimi qëndron në nivele rekord të larta, inflacioni është i ulët dhe kostot e huamarrjes ndodhen pranë zeros.
“Përveç shpenzimeve konsumatore dhe në ndërtim, eksportet dhe investimet në pajisje janë rritur gjithashtu”, deklaroi ministria. Produkti i Brendshëm Bruto u rrit me 0.7% në tremujorin e parë, ndjekur nga një rritje me 0.6% në të dytin, nxitur nga rritja e shpenzimeve të ekonomive familjare dhe atyre shtetërore si dhe investimeve më të mëdha në ndërtesa dhe makineri.
“Tregues sinjalizojnë një vazhdim të vrullit në pjesën e mbetur të vitit, megjithatë, jo në nivelin e gjysmës së parë”, deklaron ministria. Qeveria gjermane rriti këtë javë projeksionet për ekonominë në 2% për 2017-ën, nga 1.5% që vlerësonte më parë, dhe në 1.9% për vitin që vjen.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.