Vucic: Marrëveshja me Kosovën, çështje muajsh. Nuk kemi kohë për vite
Presidenti i Serbisë Aleksandar Vuçiç është shprehur ditën e mërkurë mbi bisedimet me Kosovën dhe marrëveshjen e mundshme që pritet të dalë nga takimet me krerët e shtetit të Kosovës.
Sipas tij, është e nevojshme të zgjidhen marrëdhëniet Serbo-Shqiptare njëherë e përgjithmonë. Por, megjithë rëndësinë që ka kompromisi për të bërë një jetë në paqe, Vuçiç shtoi se Serbia këmbëngul që një marrëveshje nuk mund të arrihet duke qenë se një palë është e kënaqur, por tjetra jo.
“Dua t’u them serbëve se ne kemi një realitet, se nuk jetojmë në të shkuarën mitike, por se as nuk kemi humbur gjithçka. Realiteti qëndron shumë larg këtyre dy pozicioneve”, tha Presidenti serb.
Duke folur për arritjet e bisedimeve, Vuçiç nënvizoi se gjatë katër viteve të fundit asnjë serb nuk është vrarë në konflikte etnike. Megjithatë ai nuk mundi të garantojë plotësisht se nuk do të ketë konflikte të armatosura në Kosovë.
I pyetur se sa gjatë mund të zgjasë dialogu me Kosovë, ai u shpreh se ishte çështje muajsh.
“Nuk kemi kohë për vite. Do të doja shumë një zgjidhje, por nëse nuk ka një të tillë, do të jetë një konflikt i ngrirë”, tha Vuçiç.
Gjatë fjalimit të tij, presidenti shprehu keqardhjen se nuk kishte mundur të bllokonte paraqitjen e Kosovës në një sërë eventesh sportive, por ai u shpreh i bindur se pa arritur një marrëveshje kënaqëse për palën serbe, anëtarësimi në OKB do të jetë një mision i pamundur.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.