Vuçiç merr detyrën e Presidentit – “Ruajmë paqen në Ballkan dhe fuqizojmë ushtrinë”

Aleksandar Vuçiç u betua në detyrë si President i Serbisë të Mërkurën në mesditë, duke u zotuar të punojë për paqe dhe stabilitet në Ballkan, por njëkohësisht edhe të fuqizojë forcat e armatosura.

Të mërkurën Vuçiç po ashtu hoqi dorë nga detyra e kryeministrit, ndërsa opozita e shoqëroi procesin me protesta kundër “regjimit autokratik të Vuçiç”. Gjatë protestave në Beograd pati disa përplasje sporadike mes mbështetësve të Vuçiç dhe kundërshtarëve, të cilët policia i ndaloi të hynin në ndërtesën e parlamentit.

“Ne duhet të krijojmë një rajon ku diferencat janë një avantazh dhe jo baza për përplasje. Ka patur mjaft varrime në Ballkan, ka ardhur koha për të patur lindje”, u shpreh Presidenti i ri gjatë fjalimit të inaugurimit.

“Ndërsa na duhet të flasim me të gjithë, na duhet edhe të forcojmë kapacitetin tonë mbrojtës”, tha Vuçiç duke shtuar se Serbia nuk do të bashkohet me NATO-n e as me ndonjë aleancë tjetër ushtarake.

Sa i takon integrimit të Serbisë në Bashkimin Europian, Vucic e përmendi vetëm një herë fare pak, duke thënë se “askush nuk duhet të dyshojë për rrugën e Serbisë drejt BE”.

Vuçiç ndjek në detyrë Tomislav Nikoliç, një nacionalist dhe mbështetës i Rusisë. Pavarësisht postit kryesisht honorifik, fjalimi i tij tregoi se ai ka ndërmend të vazhdojë të luajë një rol drejtues në politikën serbe.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.