WEF promovon turizmin në Shqipëri – Indeksi i konkurrueshmërisë në turizëm, ngjitemi me 12 vende
Forumi Ekonomik Botëror (WEF) ka publikuar raportin më prestigjioz në nivel global sa i përket konkurrueshmërisë së një ekonomie të caktuar në fushën e turizmit. Indeksi i konkurrueshmërisë në turizëm dhe udhëtimit mat një sërë faktorësh dhe politikash që mundësojë zhvillimin e sektorit, gjë që më pasi kontribuon edhe në zhvillimin dhe konkurrueshmërinë e një ekonomie.
Raporti në fjalë publikohet çdo dy vite, dhe tregon se për 2019-ën, Shqipëria ka fituar plot 12 pozicione në renditjen e përgjithshme, duke u renditur në vendin e 86-të ndër 140 shtete të globit. Pavarësisht ngjitjes së ndejshme në renditje, vendi ynë ka fituar shumë pak terren krahasuar me fqinjët territorialë por edhe me vendet e tjera të kontinentit të vjetër. Krahasuar me fqinjët, Shqipëria ka arritur të tejkalojë Maqedoninë e Veriut në renditje, ndërkohë që në nivel rajonal, veç Maqedonisë së Veriut, lë pas edhe Bosnje Hercegovinën dhe Moldavinë. Raporti vë në dukje faktin se, Shqipëria, së bashku me Serbinë dhe Ukrainën janë tre vendet që kanë regjistruar përmirësimin më të madh në këto dy vite në raport.
Indeksi i përgjithshëm përpilohet mbi bazën e disa nën-indikatorëve. Vendi ynë e regjistron performancën më të keqe në drejtim të burimeve kulturore e udhëtimeve të biznesit si dhe infrastrukturës aeroportuale. Performanca më e mirë ndërkohë vjen në drejtim të sigurisë, higjienës si dhe konkurrueshmëirsë së çmimeve. Në drejtim të sigurisë, Shqipëria është më mirë se të gjithë fqinjët rajonalë, por jo e njëjta gjë mund të thuhet sa i përket konkurrueshmërisë së çmimeve. Në nivel global, në vend të parë renditet Spanja, e ndjekur nga Franca dhe Gjermania, ndërkohë që në vend të fundit renditet Jemeni.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.