Xiaomi kalon Apple në shitje / Firma kineze po përpiqet të hyjë në tregun premium të telefonave
Prodhuesi kinez i smartfonave, Xiaomi, ishte kompania e dytë më e madhe në tremujorin e dytë, duke kaluar Apple. Xiaomi zinte një pjesë prej 17% të dërgesave botërore të telefonave, përpara Apple me 14% dhe pas Samsung me 19%. “Xiaomi po rrit biznesin jashtë vendit shumë shpejtë”- deklaroi firma hulumtuese Canalys, duke theksuar se dërgesat janë rritur me 300% me bazë vjetore në Amerikën Latine dhe me 50% në Europën Perëndimore.
Prodhuesi kinez publikoi një rritje të dërgesave vjetore të telefonave prej 83%, krahasuar me 15% nga Samsung dhe 1% për Apple. Megjithatë, sipas analistëve, telefonat Xiaomi janë ende të anuar drejt tregut në masë, me një çmim mesatar të shitjes 75% më lirë se Apple.
Megjithatë, kompania me seli në Pekin, deklaroi se po përpiqet të hyjë në tregun premium. Më herët gjatë vitit, Xiaomi prezantoi Mi 11 Ultra, një smartphone premium që nis nga 928 dollarë, si dhe telefonin e parë të palosshëm, Mi Mix Fold, në 1,545 dollarë. Ky varg çmimi e vendos Xiaomi përballë Apple dhe Samsung në segmentin premium. Megjithatë, rivalët lokalë si Oppo dhe Vivo, po përiqen gjithashtu të marrin pjesë tregu.
Xiaomi ka përfituar nga vështirësitë e Huawei. Huawei ishte dikur shitësi më i madh i telefonave në botë, por sanksionet amerikane kanë shkëputur kompaninë kineze nga zinxhirë kryesorë të ofertave, përfshirë softuerë dhe mikroçipet, duke goditur shitjet e kompanisë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.