Yellen dëshmon në Kongres – FED mund të ngadalësojë ritmin e tkurrjes monetare, dollari bie

Ekonomia e Shteteve të Bashkuara është fuqizuar mjaftueshëm në mënyrë që Rezerva Federale të rrisë normat e interesit dhe të nisë reduktimi e portofolit të obligacioneve.

Megjithatë, inflacioni i dobët dhe një normë e ulët neutrale e interesit mund t’i lënë bankës liri të kufizuar veprimi, thotë kryetarja e bordit të guvernatorëve Janet Yellen.  Në dëshminë përballë kongresit, që mund të jetë e fundit për të, Yellen përshkroi një ekonomi që ndërsa është rritur me hapa të ngadaltë, ka vazhduar të shtojë vende pune, ka përfituar nga konsumi i qëndrueshëm privat dhe fuqizimi i investimeve nga bizneset. Tashmë, sipas saj, po mbështetet edhe nga kushtet më të mira ekonomike nga jashtë.

“Rezerva Federale vazhdon të besojë që zhvillimi i ekonomisë do të garantojë rritje graduale të normave të interesit me kalimin e kohës”, tha Yellen në dëshminë e saj, duke shtuar se reduktimi i portofolit prej më shumë se 4 trilionë dollarë në letra me vlerë do të nisë brenda këtij viti.

Megjithatë, ajo theksoi se duke marrë parasysh vlerësimet aktuale, norma e fondeve federale nuk do të rritet shumë për të arritur nivelin neutral, ku nuk jep efekte pozitive dhe as negative te aktiviteti ekonomik.

Yellen tha se ekonomisë i duhen ende kushtet lehtësuese monetare, duke sinjalizuar një ritëm më të ngadaltë të rritjes së normave të interesit.  Këto komente patën ndikim negativ te valuta e gjelbërt.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.