Yield-i i bonove – Bie për herë të parë që nga muaji prill

Interesi i bonove të thesarit ka frenuar rritjen për herë të parë që nga prilli i këtij viti. Sipas të dhënave nga Banka e Shqipërisë, bonot me maturim 12 mujor u emetuan të martën me një interes mesatar të ponderuar prej 2.45%, nga 2.46% që kishte qenë në ankandin e mëparshëm.

Frenimi i rritjes së interesave konfirmon një tendencë stabiliteti në tregun primar të bonove të thesarit. Në ankand, qeveria siguroi të gjithë shumën e shpallur për 8.2 miliardë lekë hua, ndërsa vlera totale e kërkesave arriti në rreth 8.6 miliardë lekë. Ky është një sinjal i mëtejshëm se kthimi në rritje i normave të interesit në ekonomi do të kërkojë ende kohë.

Në fillim të këtij muaji, Guvernatori i Bankës së Shqipërisë, Gent Sejko, tha se përfundimi i kursit stimulues të politikës monetare mund të shtyhet, madje ai nuk përjashtoi as një ulje të mëtejshme të normave të interesit, nëse do të ketë rënie të mëtejshme të inflacionit, për shkak të goditjeve të ofertës.

Tregu i bonove të thesarit duket se ka reaguar me një frenim të rritjes së normave të interesit. Nuk pritet që deri në fund të këtij viti interesat e bonove të kenë luhatje të forta. Normat e interesit në tregjet financiare priten të qëndrojnë të ulëta, çka do të favorizojë kreditimin e lirë të ekonomisë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.