Youtube teston opsionin më të ri – I ngjashëm me “Storiet” e platformave të tjera

Youtube po teston një tipar të ri të quajtur “Reels” që të paktën në koncept është i ngjashëm me “Storiet” e Snapchat dhe Instagram.

Shpjegimi që Youtube ka dhënë për futjen e këtij funksioni të ri nuk është i ndryshëm nga ato të rrjeteve të tjera sociale.

“Njerëzit dëshirojnë një mënyrë për të ndarë përmbajtjen pa pasur nevojë të shkojnë dhe të publikojnë një video tradicionale në YouTube”.

Por në ndryshim nga platformat e tjera, “Storiet” e YouTube nuk do të fshihen brenda natës.

Krijuesit mund të realizojnë video 30 sekondëshe dhe t’u shtojnë atyre gjithçka që dëshirojnë si filtra të ndryshëm, muzikë, tekst etj.

Mbërritja e Reels në Youtube erdhi së bashku me platformën sociale të re Youtube Community ku krijuesit mund të angazhojnë ndjekësit e tyre.

Nisur rreth një vit më parë për krijuesit më të zgjedhur, veçoritë e komunitetit të YouTube tashmë janë në dispozicion për kanalet me më shumë se 10,000 abonentë.

Në seksionet e tyre “Community”, krijuesit mund të ndajnë sondazhe, fotografi, tekst, GIF dhe përmbajtje të tjera , të dizenjuara për të lejuar që kanalet t’i transmetojnë përmbajtjet e tyre të reja në YouTube vetë (në vend të platformave të tjera sociale) midis ngarkimeve të videove kryesore.

V.H/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.