Zbardhet vendimi i pagave – Ja rritja për çdo kategori, minimalja 32 mijë lekë

Vendimi i miratuar në Këshillin Bashkiak,  përcakton saktësisht rritjen e pagave për funksionarët, nëpunësit civilë, punonjësit administrativë të Bashkisë Tiranë, si dhe punonjësit e Policisë Bashkiake.

“TV SCAN” ka siguruar vendimin në fjalë, ku konkretisht niveli i pagës për dy kategoritë e para, fillon nga 38 mijë lekë që i korrespondon pozicionit specialist i tretë, deri në masën 174.760 lekë që është paga e Kryetarit të Bashkisë.

Nga rritja, i vetmi që nuk përfiton është pozicioni i kryebashkiakut. Administratori i Përgjithshëm do të trajtohet me pagën 129.800 lekë në muaj. Paga e zv.kryetarëve arrin në 140 mijë lekë në muaj dhe për pozicionet Drejtor Kabineti, Sekretar i Këshillit Bashkiak,  Drejtor i Përgjithshëm paga mujore arrin në nivelin e 114.100 lekëve.

Ndërsa këshilltarët e kabinetit dhe drejtorët e drejtorive do të paguhen me 100 mijë lekë në muaj. Për punonjësit administrativë, ku përfshihen pozicionet specialist me arsim të mesëm, magazinierë, punonjës shërbimi, recepsionistë, shoferë,  pastruese, paga varion nga 32 mijë lekë në 39 mijë lekë, plus shtesën për vjetërsinë në punë, e cila aplikohet 1 për qind pas çdo viti pune.

Niveli i pagës për punonjësit e Policisë Bashkiake, fillon nga  58.850 lekë për punonjësit e thjeshtë, deri në  97.300 lekë për kryeinspektorin.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.